சூர்யாவுக்கு விருது நிச்சயம்!. ஹாலிவுட்டுக்கு டஃப் கொடுக்கும் கங்குவா டிரெய்லர் வீடியோ!…

Kanguva: தமிழ் சினிமாவில் முன்னணி நடிகர்களில் ஒருவராக இருப்பவர் சூர்யா. பல வெற்றிப்படங்களை கொடுத்திருக்கிறார். சிங்கம், சிங்கம் 2 போன்ற படங்கள் மூலம் ஆக்‌ஷன் ஹீரோவாகவும் மாறினார். அதே சூர்யாதான் ஜெய்பீம், சூரரைப்போற்று போன்ற கதையசம்கொண்ட நடிப்புக்கு தீனி போடும் படங்களில் நடித்திருக்கிறார்.

அந்த வரிசையில் சூர்யா வித்தியாசமான தோற்றத்தில் நடித்திருக்கும் திரைப்படம்தான் கங்குவா. ஹாலிவுட் பட பாணியில் ஒரு சரித்திர கதையாக இப்படம் உருவாகி இருக்கிறது. 100 வருடங்களுக்கு முன்பு காட்டுப்பகுதிகளில் மக்கள் ஒரு குழுவாக வாழ்ந்தார்கள். அவர்களுக்கென ஒரு தலைவன் இருப்பான்.

வில்லன் அவர்களை கொல்ல நினைக்க கதாநாயகன் எப்படி போரிட்டு வில்லனை அழிக்கிறான் என்பதுதான் கதை. இதுபோன்ற ஆயிரக்கணக்கான படங்கள் ஹாலிவுட்டில் வெளியாகியுள்ளது. தமிழில் முதன் முயற்சியாக கங்குவா உருவாகியுள்ளது. சிறுத்தை, வீரம், வேதாளம், விஸ்வாசம், அண்ணாத்த போன்ற படங்களை இயக்கிய சிவா இப்படத்தை இயக்கியுள்ளார்.

மொத்தம் 2 பாகங்களாக இப்படம் உருவாகி வருகிறது. இதில் முதல் பாகம் வருகிற அக்டோபர் மாதம் 10ம் தேதி உலகமெங்கும் பல மொழிகளிலும் வெளியாகவுள்ளது. இந்த படத்தின் வில்லனாக பாலிவுட் நடிகர் பாபி தியோல் நடித்திருக்கிறார். மேலும், திஷா பத்தானி, ரெட்டிங் கின்ஸ்லி, யோகிபாபு உள்ளிட்ட பலரும் நடித்துள்ளனர்.

அதிரடி ஆக்‌ஷன் கதையாக இப்படம் உருவாகியுள்ளது. இந்நிலையில்தான் இந்த படத்தின் டிரெய்லர் வீடியோவை படக்குழு வெளியிட்டுள்ளது. அதில், அசத்தலான மற்றும் ஆக்ரோஷமான சண்டை காட்சிகள் இடம் பெற்றுள்ளது. சூர்யாவின் எண்ட்ரியும், வில்லனின் ஆக்ரோஷமும் சிறப்பாக அமைக்கப்பட்டிருக்கிறது.

ஹாலிவுட்டுக்கு சவால் விடும் வகையில் இந்த படத்தை படக்குழு உருவாக்கியிருப்பது படத்தின் மேக்கிங்கை பார்த்தாலே புரிகிறது. இந்த படத்திற்கு தேவி பிரசாத் இசையமைத்துள்ளார்.