ராஜமௌலி படத்தில் வில்லனாக நடிக்கிறாரா நிதின் சத்யா? தீயாய் பரவும் செய்தி!

சென்னை 28 உள்ளிட்ட படங்களில் நடித்து பிரபலமான நிதின் சத்யா இப்போது ராஜமௌலி இயக்கி வரும் ஆர் ஆர் ஆர் படத்தில் நடிக்க போவதாக செய்திகள் வெளியாகியுள்ளன.

வசூல்ராஜா, ஜி உள்ளிட்ட படங்களில் நடித்தவர் நடிகர் நிதின் சத்யா. வெங்கட் பிரபுவின் நண்பரான இவர் சென்னை 28, சத்தம் போடாதே ஆகிய படங்களின் பிரபலமானார். அதன் பின் பல படங்களில் குணச்சித்திர கதாபாத்திரங்களில் நடித்தாலும் அவருக்கென்று பெரிய வாய்ப்புகள் கிடைக்கவில்லை. அதனால் தயாரிப்பாளராக மாறிய அவர் ஜெய்யை வைத்து ஜருகண்டி உள்ளிட்ட படங்களைத் தயாரித்தார். இப்போது வைபவ்வை வைத்து லாக்கப் எனும் படத்தை தயாரித்துள்ளார். இந்நிலையில் தெலுங்கில் இயக்குனர் ராஜமௌலி பிரம்மாண்டமாக இயக்கி வரும் ஆர் ஆர் ஆர் படத்தில் வில்லனாக நடிப்பதாக ஒரு செய்தி தீயாய் பரவியது.

இதுகுறித்து இப்போது அவர் விளக்கம் அளித்துள்ளார். அதில் ‘இந்த செய்தியை யார் பரப்பினார்கள் என்றே தெரியவில்லை. இதில் துளி கூட உண்மையில்லை. ஆனால் அப்படி ஒரு வாய்ப்பு வந்தால் கண்டிப்பாக நடிப்பேன்’ என்றும் கூறியுள்ளார்.