படம் பார்த்துவிட்டு அஜித் கொடுத்த ரியாக்ஷன்!.. ஆதிக் ரவிச்சந்திரன் செம ஹேப்பி….
Good Bad Ugly: அஜித் ரசிகர்கள் ஆவலுடன் எதிர்பார்த்த குட் பேட் அக்லி திரைப்படம் நேற்று வெளியாகிவிட்டது. அஜித்தை ஒரு மாஸ் ஹீரோவாக பார்க்க ஆசைப்பட்ட அவரின் ரசிகர்களுக்கு இப்படம் ஒரு செம ட்ரீட்டாகவே அமைந்துவிட்டது. ஏனெனில், படத்தில் மாஸ் காட்சி என இல்லாமல் படம் முழுக்கவே மாஸான காட்சிகளை பார்த்து பார்த்து வைத்திருக்கிறார் ஆதிக் ரவிச்சந்திரன்.
அஜித்தின் தீவிர ரசிகராக தியேட்டரில் விசில் அடித்து படம் பார்த்தவர் ஆதிக் ரவிச்சந்திரன். அஜித்தை ஒருமுறை பார்க்க வேண்டும் என்பதே இவரின் பெரிய ஆசையாக இருந்தது. ஆனால், இப்போது அவரை வைத்து ஒரு படமே இயக்கிவிட்டார். இத்தனைக்கும் தொடர் ஹிட் படங்களை கொடுத்தவர் இல்லை ஆதிக்.
இவரின் முதல் படம் திரிஷா இல்லனா நயன்தாரா. ஜிவி பிரகாஷ் ஹீரோவாக நடித்த இந்த படத்தில் கிளுகிளுப்பான காட்சிகள் இடம் பெற்றிருந்தது. அதோடு, எல்லோருக்கும் பிடிக்கும் படி அதை ஜாலியாக சொல்லி இருந்ததால் படம் ரசிகர்களிடம் வரவேற்பை பெற்று ஹிட் அடித்தது.
அதன்பின் சிம்புவை வைத்து அன்பானவன் அசராதவன், அடங்காதவன் படத்தை இயக்கினார். சிம்பு ஒழுங்காக ஒத்துழைப்பு கொடுக்காததால் ஆதிக்கால் அவர் நினைத்தபடி படத்தை எடுக்க முடியவில்லை. எனவே, அரைகுறையாக படம் வெளியாகி தோல்வி அடைந்தது. இதனால் 5 வருடங்கள் ஆதிக் எந்த திரைப்படத்தையும் இயக்கவில்லை. பிரபுதேவா நடிப்பில் வெளிவந்த பகீரா படம் பிளாப் ஆனது.
இடையில் அஜித் நடித்த நேர்கொண்ட பார்வை படத்தில் ஒரு சின்ன வேடத்தில் நடித்தார். அப்போது அஜித்துடன் பழகும் வாய்ப்பு கிடைத்தது. ‘நீ ஒரு ஹிட் கொடுத்துவிட்டு வா. உன் இயக்கத்தில் நான் நடிக்கிறேன்’ என அஜித் நம்பிக்கை கொடுக்க உற்சாகமான ஆதிக் விஷால், எஸ்.ஜே.சூர்யாவை வைத்து மார்க் ஆண்டனி படத்தை இயக்கினார். இந்த படம் சூப்பர் ஹிட். எனவே குட் பேட் அக்லி சாத்தியமானது.
குட் பேட் அக்லி படத்தை பார்த்துவிட்டு வெளியே வந்த அஜித் ‘வெங்கட்பிரபுவுக்கு பின்னாடி என்னை இவ்வளவு சந்தோஷமா வச்சிருந்தது நீதான்’ என சொல்லிவிட்டு போனாராம். ஆதிக்குக்கு இதை விட சந்தோஷம் என்ன வேண்டும். இப்போது படமும் சூப்பர் ஹிட் அடித்து ரசிகர்கள் கொண்டாடி வருகிறார்கள். இந்த படம் ஹிட் எனில் நாம் சேர்ந்து இன்னொரு படம் பண்ணலாம் என ஆதிக்கிடம் அஜித் சொல்லியிருக்கிறார். எனவே, அஜித்தின் அடுத்த படத்தையும் ஆதிக்கே இயக்க அதிக வாய்ப்பிருக்கிறது.