அது லோகேஷ்தான் பண்ண முடியும்!. என்னால முடியாது!.. மணிரத்னம் சொன்னது என்ன?...

Manirathnam: மாநகரம், கைதி, மாஸ்டர், விக்ரம், லியோ என 5 படங்களை மட்டுமே இயக்கியிருந்தாலும் தமிழ் சினிமாவில் கவனிக்கத்தக்க இயக்குனராக மாறியிருப்பவர் லோகேஷ் கனகராஜ். போதை மருந்து கடத்தில் பின்னணியிலேயே அவர் கதை, திரைக்கதை அமைக்கிறார். சென்னை போன்ற பெரு நகரங்களின் இருண்ட உலகத்தை அவர் காட்டுகிறார்.

இதனாலேயே அவரின் படங்கள் ரசிகர்களுக்கு வித்தியாசமான அனுபவத்தை கொடுக்கிறது. லோகேஷ் கனகராஜ் எடுக்கும் படங்களை ரசிகர்கள் லோகீ யூனிவர்ஸ் என அழைக்கிறார்கள். மேலும், அவரின் ஒரு படத்தில் வரும் கதாபாத்திரம் அவரின் அடுத்த படத்திலும் தொடர்ச்சியாக வருவதை எல்.சி.யூ (லோகி சினிமாட்டிக் யூனிவர்ஸ்’ என்றும் சொல்கிறார்கள்.

எனவே, அவர் எப்போது புது படத்தை துவங்கினாலும் ‘இதில் எல்.சி.யூ இருக்கா?’ என்பதே பலரின் கேள்வியாக இருக்கிறது. கைதி படத்தில் வரும் கதாபாத்திரங்கள் விக்ரம் மற்றும் லியோ படங்களில் வந்தது. விக்ரம் படத்தில் வரும் ரோலக்ஸ் கதாபாத்திரத்தை வைத்து ஒரு முழு படம் எடுப்பதாக சொல்லி சூர்யா ரசிகர்களுக்கு வைப் கொடுத்திருக்கிறார் லோகேஷ்.

லோகேஷ் இப்போது ரஜினியை வைத்து கூலி படத்தை இயக்கி வருகிறார். இந்த படத்தில் எல்.சி.யூ என எதுவும் இல்லை. இது முழுக்க முழுக்க புதிய கதை என சொல்லியிருக்கிறார். இந்த படத்தில் சத்யராஜ், சௌபின் சாஹிர், உபேந்திரா, நாகார்ஜூனா போன்ற நடிகர்களும் நடித்திருக்கிறார்கள். இந்த படம் வருகிற ஆகஸ்டு 14ம் தேதி வெளியாகவுள்ளது.

ஒருபக்கம் மணிரத்னம் இயக்கத்தில் கமல், சிம்பு, திரிஷா உள்ளிட்ட பலரும் நடித்து உருவாகியுள்ள தக் லைப் படம் வருகிற ஜூன் 5ம் தேதி வெளியாகவுள்ளது. எனவே, இப்படம் தொடர்பான புரமோஷன் வேலைகளில் கமல், மணிரத்னம், திரிஷா, சிம்பு ஆகியோர் ஈடுபட்டிருக்கிறார்கள்.

இந்நிலையில், மணிரத்னத்திடம் ‘லோகேஷ் யூனிவர்ஸ் போல மணிரத்னம் யூனிவர்ஸ் வருமா?’ என கேட்டபோது ‘ஒரு படம் எடுப்பதற்கே கடினமாக இருக்கிறது. யூனிவர்ஸ் எடுப்பதற்கு லோகேஷ் கனகராஜ்தான் சரியான ஆள்’ என சொல்லி எஸ்கேப் ஆகியிருக்கிறார்.