என்னை நம்ப மாட்டீங்களான்னு கேட்ட மேக்கப் மேன்… எம்ஆர்.ராதா சொன்ன அல்டிமேட் பதில்…!

எம்.ஆர்.ராதாவின் ஒவ்வொரு செயலையும் பார்க்கும்போது ஆரம்பத்துல அதுல ஒரு வில்லத்தனம் தெரிஞ்சாலும் கொஞ்சம் உள்ளே போய் பார்த்தால் அதுல எவ்ளோ பெரிய விஷயம் புதைஞ்சி இருக்குன்னு தெரியவரும். அப்படி ஒரு சம்பவம் தான் இது…

‘நடிகவேள்’ என்று தமிழ்த்திரை உலகில் போற்றப்படுபவர் எம்.ஆர்.ராதா. இவர் ஒரு நாள் தன்னோட மேக்கப்மேன் கஜபதியை அழைக்கிறார். அவர் போனதும் அவரிடம் கொஞ்சம் பணத்தைக் கொடுக்கிறார். ‘இளங்கோவனைத் தெரியுமா?’ன்னு கேட்கிறார். ‘நல்லா தெரியும்ணே’ன்னு அவரும் சொல்றாரு.

உடனே அப்படியா அந்தப் பணத்தைக் கொடுன்னு வாங்கிக்கிடறாரு. அப்புறமா டிரைவரை அழைக்கிறார். அவரிடம் கொடுத்து இளங்கோவனிடம் போய் கொடுக்கச் சொல்கிறார். அப்போது எம்.ஆர்.ராதா கஜபதியைப் பார்க்கிறார். அவருக்கு அந்த சம்பவம் என்னவோ போல ஆகிவிட்டது. முகம் எல்லாம் மாறிப்போய் இருந்தார். ‘என்னய்யா என்னவோ மாதிரி இருக்கே..’ன்னு எம்.ஆர்.ராதா கேட்கிறார்.

அப்போது மேக்கப் மேன் கஜபதி ஆத்திரம் தாங்க முடியாமல் கேட்டு விடுகிறார். ‘என்னண்ணே… நான் கொடுக்க மாட்டேனா… என் மேல நம்பிக்கை இல்லையா?’ன்னு கேட்கிறார்.

அதற்கு எம்ஆர்.ராதா விளக்கம் சொல்கிறார். ‘இளங்கோவன் எவ்வளவு பெரிய வசனகர்த்தா… கொடி கட்டிப் பறந்தவரு… செட்ல ஒரு வசனத்தை மாத்தணும்னா கூட அவரைத் தேடிப் போய் அனுமதி வாங்கித் தான் மாத்துவாங்க. அப்பேர்ப்பட்ட ஆளு அவரு. ஆனா நீ அவர் ஓஹோன்னு இருந்தப்ப பார்த்துருக்கே. அதனால தான் அவரை நல்லா தெரியும்னு சொல்றே….

ஆனா இப்போ அவரு நிலைமையே வேற. ரொம்ப கஷ்டத்துல இருக்காரு. அவரு வீட்டை ஜப்தி செய்யப் போறாங்களாம். நீ போய் பணம் கொடுக்குறப்ப அவரு உன்னைப் பார்த்தா என்ன நினைப்பாரு? நம்ம நிலைமை இப்படி ஆயிருச்சேன்னு ரொம்ப வருத்தப்படுவாருல்ல.

அதனால் தான் அவருக்குத் தெரியாதவங்க மூலமா பணத்தைக் கொடுத்து அனுப்பிச்சேன்’னு சொன்னாராம். அவரு அவமரியாதையா நினைக்கக்கூடாது இல்லையா… அப்படின்னு விளக்கம் சொல்ல கஜபதிக்கு நெகிழ்ச்சியாகி விட்டதாம்.