Director SU Arunkumar: தமிழ் சினிமாவில் 2014 ஆம் ஆண்டு விஜய்சேதுபதி நடிப்பில் வெளிவந்த பண்ணையாரும் பத்மினியும் என்கின்ற திரைப்படத்தின் மூலமாக இயக்குனராக அறிமுகமானவர் அருண்குமார். முதல் திரைப்படத்திலேயே நல்ல பாராட்டைப் பெற்ற இவர் பின்னர் மீண்டும் விஜய் சேதுபதியை வைத்து 2016 ஆம் ஆண்டு சேதுபதி என்கின்ற திரைப்படத்தை இயக்கினார்.
இந்த திரைப்படம் விமர்சன ரீதியாகவும், வசூல் ரீதியாகவும் மிகப்பெரிய வெற்றியை பெற்றது. இதனை தொடர்ந்து கடைசியாக சித்தார்த் நடிப்பில் வெளிவந்த சித்தா என்கின்ற திரைப்படத்தை இயக்கியிருந்தார். இந்த திரைப்படம் மிகப்பெரிய வெற்றியை கொடுத்தது. மக்களிடையே ஒரு விழிப்புணர்வை ஏற்படுத்திய திரைப்படமாக இப்படம் அமைந்திருந்தது.
வீரதீரசூரன் 2: சித்தா திரைப்படத்தின் வெற்றிக்கு பிறகு இயக்குனர் அருண்குமார் நடிகர் விக்ரமை வைத்து வீரதீரசூரன் என்கின்ற திரைப்படத்தை இயக்கி வருகின்றார். இந்த திரைப்படத்தை இரண்டு பாகங்களாக இயக்கி வரும் நிலையில் இரண்டாவது பாகம் முதலில் ரிலீஸ்-ஆக இருக்கின்றது. அதனை தொடர்ந்து முதல் பாகம் வெளியாகும் என்று கூறப்படுகின்றது.
சினிமா வரலாற்றிலேயே இப்படி எந்த ஒரு திரைப்படமும் வெளியானது கிடையாது. வீரதீரசூரன் திரைப்படத்தின் இரண்டாவது பாகம் வருகிற மார்ச் 27ஆம் தேதி திரையரங்குகளில் வெளியாகவுள்ளது. இப்படத்தில் நடிகர் விக்ரமுடன் இணைந்து துஷாரா விஜயன் முக்கிய கதாபாத்திரத்தில் நடித்திருக்கின்றார்.
மேலும் எஸ்ஜே சூர்யா இப்படத்தில் வில்லன் கதாபாத்திரத்தில் நடித்திருக்கின்றார். இந்த படத்தின் டீசர் சமீபத்தில் வெளியாகி ரசிகர்களிடையே மிகப்பெரிய வரவேற்பை பெற்றிருந்தது. பொங்கல் பண்டிகைக்கு இப்படம் வெளியாகும் என்று எதிர்பார்க்கப்பட்ட நிலையில் சில காரணங்களால் படம் ரம்ஜான் பண்டிகை முன்னிட்டு வெளியாக இருக்கின்றது.
அருண்குமார் திருமணம்: தொடர்ந்து தமிழ் சினிமாவில் வளர்ந்து வரும் இயக்குனராக இருந்து வரும் அருண்குமார் வீரதீரசூரன் திரைப்படத்தின் மூலமாக முன்னணி இயக்குனர் என்கின்ற இடத்தை பிடிப்பார் என எதிர்பார்க்கப்படுகின்றது. இந்நிலையில் இன்று அவருக்கு திருமணம் நடைபெற்றுள்ளது. இவரின் திருமணத்திற்கு தமிழ் சினிமாவை சேர்ந்த ஏராளமான பிரபலங்கள் கலந்து கொண்டு வாழ்த்துக்களை தெரிவித்து இருக்கிறார்கள்.
அந்த வகையில் நடிகர் சியான் விக்ரம், சித்தார்த், விஜய் சேதுபதி, எஸ் ஜே சூர்யா, விக்னேஷ் சிவன், இயக்குனர் சசி, நடிகை துஷாரா விஜயன் உள்ளிட்ட ஏராளமான சினிமா பிரபலங்கள் இந்த திருமணத்தில் கலந்து கொண்டார்கள். தான் இயக்கிய திரைப்படத்தில் நடித்த பலரும் இந்த திருமணத்தில் கலந்து கொண்டார்கள். இவர்கள் புகைப்படங்கள் தற்போது சமூக வலைதள பக்கங்களில் வைரலாகி வருகின்றது.
