அந்த மாஸ்க்குகளை மருத்துவர்களுக்காக கொடுங்கள்! இளம் நடிகர் வேண்டுகோள்!

தமிழ், தெலுங்கு என இரு மொழிகளிலும் படங்களில் தென்னிந்தியாவில் தனக்கென ஒரு ரசிகர் கூட்டத்தை வைத்திருப்பவர் நடிகர் விஜய் தேவாரகொண்டா. கொரோனா விழிப்புணர்வு சம்மந்தமாக நடிகர்கள் வீடியோக்களையும் பதிவுகளையும் வெளியிட்டு வரும் வேளையில் விஜய்யும் மக்களுக்கு ஒரு வேண்டுகோளை தனது சமூகவலைதளப் பக்கத்தில் விடுத்துள்ளார்.

அவரது சமூகவலைதளப் பக்கத்தில் ‘என் அன்பிற்குரியவர்களே… அனைவரும் நலமாக இருப்பீர்கள் என நம்புகிறேன். துணிகளால் செய்த மாஸ்க்குகளே கூட இந்த வைரஸ் தொற்று பரவுவதைத் தடுப்பதில் உதவும். அதனால் மருத்துவ (N95) மாஸ்க்குகளை மருத்துவர்களுக்காக விட்டுவிடுங்கள். வெறும் கர்ச்சீஃப், துணி  அல்லது துப்பட்டாவால் செய்த மாஸ்க்குகளைப் பயன்படுத்துங்கள். ’ எனத் தெரிவித்துள்ளார்.

கொரோனா பீதியால் மக்கள் தேவைக்கு அதிகமாக N95 போன்ற மருத்துவ மாஸ்க்குகளை அதிகளவில் வாங்குவதால் கொரோனா நோயாளிகளுக்கு சிகிச்சை அளிக்கும் மருத்துவர்களுக்கு மாஸ்க்குகள் கிடைப்பதில் பற்றாக்குறை ஏற்பட்டுள்ளதாக சொல்லப்படுகிறது.