மூன்று அமாவாசையில் காணாமல் போகும் என்ற மூடனே – கமல் கட்சியினரின் வித்தியாசமான வாழ்த்து போஸ்டர் !

கமலின் மக்கள் நீதி மய்யம் கட்சி தொடங்கி 3 ஆண்டுகள் ஆனதை அடுத்து அவரது தொண்டர்கள் வாழ்த்து போஸ்டர் அடித்து ஒட்டியுள்ளனர்.

சினிமாவை உயிர் மூச்சாகக் கொண்ட நடிகர் கமல் அரசியல்வாதி கமலான நாள் இந்த பிப்ரவரி 21. மூன்று வருடங்களுக்கு முன்னர் இதே மக்கள் நீதி மய்யம் எனும் அவரது கட்சி உதயமானது. இதையடுத்து இன்று மக்கள் நீதி மய்யத்தினர் தங்கள் கட்சியின் மூன்றாமாண்டைக் கொண்டாடும் பொருட்டு வித்தியாசமான போஸ்டர் ஒன்றை அடித்து ஒட்டியுள்ளனர்.

அந்த போஸ்டரில் ‘ 3 அமாவாசையில் காணாமல் போகும் கட்சி என்று கூறிய மூடனே! நீ வணங்கும் தெய்வமும் நம்மவரின் சீடனே!’ என அதிமுகவினரைக் கலாய்க்கும் விதமாக போஸ்டரில் எழுதியுள்ளனர். மக்கள் நீதி மய்யம் கட்சி தொடங்கப்பட்ட போது அதிமுக அமைச்சர் ராஜேந்திர பாலாஜி ‘அந்த கட்சி 3 அமாவாசையில் காணாமல் போகும்’ என விமர்சனம் செய்தார் என்பது குறிப்பிடத்தக்கது.