முதியவர்களைக் கல்லை போட்டு கொல்லும் நபர் கைது – போதைப் பழக்கத்தால் சீரழிந்த வாழ்வு !

சேலத்தில் ஆதரவற்ற முதியவர்களைக் கல்லைத் தூக்கிப் போட்டு கொலை செய்த நபர் கைது செய்யப்பட்டுள்ளார்.

சேலம் மாவட்டத்தில் அடுத்தடுத்து இரு ஆதரவற்ற முதியவர்கள் தலையில் கல்லால் தாக்கப்பட்டு கொலை செய்யப்பட்ட சம்பவம் இம்மாத தொடக்கத்தில் பரபரப்பை ஏற்படுத்தியது. இதையடுத்து சிசிடிவி காட்சிகளில் இளைஞர் ஒருவர் அவர்களைக் கொன்றது கண்டுபிடிக்கப்பட்டது.

இதையடுத்து சந்தேகப்படும் படியாக சேலத்தில் நடமாடிய நபர் ஒருவரைக் கைது செய்த சேலம் போலீஸார். சிசிடிவி காட்சிகளில் இருக்கும் நபர்தான் அவரா எனக் கண்டுபிடிக்க இரு புகைப்படங்களையும் தடவியல் துறைக்கு அனுப்பினர். அவர்கள் இருவரும் ஒரே ஆளே என உறுதியளித்துள்ளனர்.

அவரிடம் நடத்திய விசாரணையில் அந்த நபரின் பெயர் ஆண்டிமுத்து எனக் கண்டறியப்பட்டுள்ளது. மேலும் போதைப் பழக்கத்துக்கு அடிமையான அவர் போதைப் பொருட்கள் வாங்க காசு இல்லாததால் இது மாதிரி கொலைகளை செய்து அவர்களிடம் இருந்த பணத்தை எடுத்துக் கொண்டுள்ளார் என்பதும் தெரியவந்துள்ளது.