பேய் ஓட்டுவதாக சொல்லி பெண்ணை அடித்தே கொன்ற மந்திரவாதி! அதிர்ச்சி சம்பவம்!

ராஜஸ்தான் மாநிலத்தில் பெண்ணை பேய் பிடித்திருப்பதாக சொல்லி அதை விரட்டுகிறேன் என்ற அந்த பெண்ணை அடித்தே கொன்றுள்ளார் ஒரு மந்திரவாதி.

ராஜஸ்தான் மாநிலம் ஜெய்ப்பூரைச் சேர்ந்த அந்த பெண்ணுக்கு திருமணம் ஆகி குழந்தை ஒன்று உள்ளது. மகிழ்ச்சியாக சென்று கொண்டிருந்த அவர் வாழ்வில் ஒரு சோகமாக அவரது பெற்றோர் எதிர்பாராத விதமாக அடுத்தடுத்து உயிரிழந்துள்ளனர். இதனால் அவர் மன அழுத்தத்துக்கு ஆளாகி குடும்பத்தினருடன் சரியாக பேசாமல் இருந்துள்ளார்.

இதனால் அந்த பெண்ணை மந்திரவாதியிடம் அழைத்துச் சென்றுள்ளனர் அவரது குடும்பத்தினர். ஷுயாம் என்ற அந்த மந்திரவாதியோ பெண்ணுக்கு பேய் பிடித்துள்ளதாக சொல்லி அவர்களை அதிர்ச்சியடையச் செய்துள்ளார். ஆனால் தன்னால் அந்த பேயை விரட்ட முடியும் எனக் கூறியுள்ளார். அவரது பேச்சை அப்படியே நம்பிய குடும்பத்தினர் அதற்கு சம்மதம் தெரிவித்துள்ளனர்.

இதையடுத்து பூஜை என்ற பெயரில் பேயோட்டுவதற்காக அந்த பெண்ணை கடுமையாக தாக்கியுள்ளார் ஷ்யாம். அதுமட்டுமில்லாமல் அவரைக் கீழே தள்ளி அவர் மேல் ஏறி உட்கார்ந்து அடித்துள்ளார். இதனால் அந்த பெண்ணுக்கு மூச்சுத்திணறல் ஏற்பட்டு உடல்நிலை மிகவும் பாதிக்கப்பட்டுள்ளது.

இதையடுத்து சிகிச்சைக்காக மருத்துவமனையில் அனுமதிக்கப்பட்ட அந்த பெண் சிகிச்சை பலனளிக்காமல் பரிதாபமாக உயிரிழந்துள்ளார். இதையடுத்து மந்திரவாதி மேல் புகார் கொடுக்கப்பட்டு அவர் இப்போது கைது செய்யப்பட்டுள்ளார்.