முஸ்லீம் என்பதால் என்னை கற்பழிக்க சொல்லி மிரட்டுகின்றனர் – மோடியிடம் முறையிட்ட குஷ்பு

நடிகையும் காங்கிரஸ் கட்சியின் செய்தித் தொடர்பாளருமான குஷ்புவுக்கு மர்ம நபர் ஒருவர் மிரட்டல் விடுத்துள்ளது பரபரப்பை ஏற்படுத்தியுள்ளது.

நடிகையாக இருந்த குஷ்பு தனக்கான வாய்ப்புகள் குறைந்தபோது அரசியலில் நுழைந்தார். முதலில் திமுகவில் இருந்த அவர் பின்னர் காங்கிரஸில் தன்னை இணைத்துக் கொண்டார். இப்போது காங்கிரஸ் கட்சியின் தமிழக செய்தி தொடர்பாளராக இருந்து வருகிறார். ஆனால் சமீபகாலமாக அவர் பாஜகவுக்கு ஆதரவாக சில டிவீட்களைப் போட்டு சர்ச்சைகளில் சிக்கினார்.நேற்று ராமர் கோவில் அடிக்கல் நடும் விழாவுக்கு கூட வாழ்த்து தெரிவித்திருந்தார்.

இதையடுத்து நேற்று தன் சமூகவலைதளத்தில் ஒரு தொலைபேசி எண்ணைப் பகிர்ந்து அந்த எண்ணில் இருந்து அழைக்கும் நபர் தனக்கு தொடர் மிரட்டல் விடுப்பதாக குற்றம் சாட்டியுள்ளார். மேலும் அந்த நபர் நான் முஸ்லிம் என்பதாலேயே வல்லுறவு செய்யப்பட வேண்டும் எனவும் கூறியுள்ளதாக தெரிவித்துள்ளார். இதையடுத்து பிரதமர் நரேந்திரமோடியை டேக் செய்து இதுதான் ராமனின் பூமியா என்றும் கேள்வி எழுப்பியுள்ளார். அந்த எண்ணைப் பற்றி விசாரித்ததில் அது கொல்கத்தாவில் இருந்து அழைப்பு வந்ததாகக் கண்டுபிடிக்கப்பட்டுள்ளது.