விளக்கேற்ற சொன்ன மோடி… இதைக்கேட்டு என்னெல்லாம் உளரப் போறாய்ங்களோ!

ஊரடங்கு அமலில் இருக்கும் நேரத்தில் இன்று காலை 9 மணிக்கு மக்களிடையே உரையாற்றிய பிரதமர் நரேந்திர மோடி கொரோனா இருளை அகற்ற வரும் 5ம் தேதி இரவு 9 மணி முதல் 9 நிமிடங்களுக்கு மக்கள் தங்கள் வீட்டு வாசல், பால்கனியில் விளக்கேற்ற வேண்டும் அல்லது டார்ச் அல்லது செல்போன் டார்ச் அடிக்க வேண்டும் என்று கோரிக்கை விடுத்துள்ளார். மோடியின் இந்த அறிவிப்பு பலரையும் அதிருப்தி அடையச் செய்துள்ளது.

மோடி அறிவிப்பு வெளியிட்ட கையோடு சினிமா ரசிகர்கள் மோகன்லால் மற்றும் பாலிவுட் நடிகர் அமிதாப் பச்சன் ஆகியோரின் ட்விட்டர் கணக்கு பக்கம் சென்று கொண்டிருக்கிறார்கள். முன்னதாக மோடி கைதட்டுமாறு கேட்டுக் கொண்டபோது கைதட்டினால் அந்த சப்தத்தில் வைரஸ் அழிந்துவிடும் என்று அமிதாப் பச்சன் ட்வீட் செய்து பின்னர் மக்கள் விளாசியதால் நீக்கினார். மோடி கைதட்டச் சொன்ன நாள் அமாவாசை என்றும் அன்று வைரஸ், பாக்டீரியாவின் வீரியம் அதிகம் இருக்கும் என்றும் அமிதாப் தெரிவித்தார். மோகன்லாலும் கைதட்டினால் வைரஸ் அழியும் என்று பேட்டி அளித்தார்.

வரும் 5ம் தேதி பிரதோஷம் என்பதால் விளக்கேற்றினால் நன்மையாம். மேலும் 9 மணி முதல் 9 நிமிடங்கள் விளக்கேற்றச் சொல்வது நவகிரக சாந்திக்காக இருக்கலாம் என்று ஏற்கனவே பேச்சு கிளம்பியுள்ளது. கிரகம், பிரதோஷம் இது போன்றவற்றில் அதிக நம்பிக்கை வைத்திருக்கும் அமிதாப் பச்சன் நிச்சயம் ட்வீட் செய்து விளக்கேற்றினால் காற்றில் உள்ள வைரஸ் அழியும் என்பார் என்று சினிமா ரசிகர்கள் நம்புகிறார்கள்.

அமிதாப் பச்சன், மோகன்லால் ஆகியோருக்கு ஏகப்பட்ட ரசிகர்கள் உள்ளனர். அவர்கள் எது சொன்னாலும் ரசிகர்கள் நம்புவார்கள். இந்நிலையில் அவர்கள் கைதட்டினால் வைரஸ் அழியும் என்று கூறியதை தான் பலராலும் ஏற்க முடியவில்லை. அந்த பிரச்சனை அடங்குவதற்குள் மோடி அடுத்த அறிவிப்பை வெளியிட்டுள்ளார் என்பது குறிப்பிடத்தக்கது.