Box Office
அலைமோதும் கூட்டம்!.. குறையாத வசூல்!… ரீ-ரிலீஸில் மாஸ் காட்டும் கேப்டன் பிரபாகரன்!..
Captain Prabhakaran: புரட்சிக் கலைஞர் விஜயகாந்தின் நூறாவது திரைப்படமாக 1991ம் வருடம் வெளியாகி சூப்பர் ஹிட் அடித்த திரைப்படம்தான் கேப்டன் பிரபாகரன். இந்த படத்தில்தான் மன்சூர் அலிகான் வில்லனாக அறிமுகம் செய்யப்பட்டார். மேலும், ரூபிணி, சரத்குமார். லிவிங்டன், ரம்யா கிருஷ்ணன், காந்திமதி உள்ளிட்ட பலரும் முக்கிய வேடத்தில் நடித்திருந்தனர். வனத்துறை அதிகாரியான தனது நண்பன் சரத்குமார் வீரப்பனை பிடிக்க போய் காணாமல் போய்விட அவனை தேடி விஜயகாந்த் செல்லும் கதைக்கு பரபர திரைக்கதை அமைத்து அசத்தியிருந்தார் ஆர்கே செல்வமணி.
தமிழ் சினிமாவில் ஒரு ஆங்கில படம் போல படத்தின் மேக்கிங் இருந்தது. அந்த அளவுக்கு மிகுந்த சிரத்தையுடன், அதிக உழைப்பை போட்டு இப்படத்தை உருவாக்கி இருந்தார் இயக்குனர் ஆர்.கே.செல்வமணி. இந்த படத்தில் இடம்பெற்ற சண்டைக் காட்சிகளும், அனல் பறக்கும் வசனங்களும் ரசிகர்களிடம் பெரும் வரவேற்பை பெற்றது. மேலும் இளையராஜாவின் இசையில் உருவான ‘ஆட்டமா தேரோட்டமா’ பாடல் ரசிகர்களை ஆட்டம் போட வைத்தது.
இந்த படம் பல திரையரங்குகளில் 100 நாட்களுக்கும் மேல் ஓடி வசூலை அள்ளியது. சில தியேட்டர்களில் 250 நாட்களுக்கும் மேல் ஓடியது. இந்நிலையில்தான் கடந்த ஆகஸ்ட் 22ஆம் தேதி கேப்டன் பிரபாகரன் 4K தொழில்நுட்பத்தில் சுமார் 100 தியேட்டர்களில் ரீ- ரிலீஸ் செய்யப்பட்டது. ரீ-ரிலிஸான முதல் நாளில் இருந்தே இப்படத்திற்கு ரசிகர்களிடம் நல்ல வரவேற்பு கிடைத்து வருகிறது. முதல் இரண்டு நாட்கள் லட்சங்களில் வசூல் ஆனாலும் அடுத்த 9 நாட்களும் இப்படம் தினமும் 2 கோடி அளவுக்கு வசூல் செய்திருக்கிறது.
படம் வெளியாகி 11 நாட்கள் ஆகிவிட்ட நிலையில் கேப்டன் பிரபாகரன் இதுவரை 21.53 கோடியை வசூல் செய்திருக்கிறது. இந்த வார வெள்ளிக்கிழமை விடுமுறை வருகிறது. அதையொட்டி 2 வார இறுதி நாட்கள் என 3 தொடர் விடுமுறை வருவதால் எப்படியும் கேப்டன் பிரபாகரன் படம் 30 கோடி வசூலை தாண்டும் என கணிக்கப்படுகிறது.
