×

24 மணி நேரத்தில் இடிக்கப்பட்ட கொரோனா தடுப்பு சுவர்!

வேலூர் மாவட்டத்தில் கொரோனா வைரஸ் தடுப்பு நடவடிக்கையை தீவிரப்படுத்தும் வகையில் தமிழக-ஆந்திர எல்லையில் அமைந்துள்ள பொன்னை, சைனகுண்டா ஆகிய 2 சோதனைச்சாவடிகள் மறு உத்தரவு வரும் வரை மூடப்படும் என மாவட்ட ஆட்சியர் சண்முகசுந்தரம் அறிவித்தார்.

 

அதைத் தொடர்ந்து சாலைகள் முழுவதுமாக மூடப்படும் வகையில் சாலையை மறித்து 3 அடி உயரம் வரை சுவர் எழுப்பப்பட்டன.

2 சோதனைச்சாவடிகள் மூடப்பட்டதால் அத்தியாவசிய பொருட்களை ஏற்றிக்கொண்டு ஆந்திராவில் இருந்து பொன்னை வழியாக வரும் வாகனங்கள் கிருஸ்டியான்பேட்டை சோதனைச் சாவடி வழியாகவும், சைனகுண்டா வழியாக வரும் வாகனங்கள் பரதராமி சோதனைச்சாவடி வழியாகவும் செல்ல வலியுறுத்தப்பட்டது.

இவ்வழியாக இருசக்கர வாகனங்கள் மட்டுமே அனுமதிக்கப்படும் என்றும் வெளிமாநிலத்தில் இருந்து வருவோரை கண்காணிக்கவே இந்த எல்லை சாலை மூடல் என்றும், மற்ற சோதனைச்சாவடிகளில் வரும் வாகன ஓட்டிகளை பரிசோதிக்க அந்தந்த மாநில எல்லை சோதனைச்சாவடிகளில் சிறப்பு பரிசோதனை மையங்கள் அமைக்கப்பட்டுள்ளதாகவும் மாவட்ட ஆட்சியர் சண்முகசுந்தரம் தெரிவித்திருந்தார்.

இவ்வாறு சாலைகள் மூடப்பட்டதால் அவசரத் தேவைக்கு ஆம்புலன்ஸ் வாகனங்கள் செல்ல முடியாமல் சிரமம் ஏற்பட்டது. அத்தியாவசிய பொருள்களைக் கொண்டு வரும் வாகனங்கள் சுற்றி வந்ததால் சிரமம் ஏற்பட்டது. இதனால் இந்த சுவர்களை உடனடியாக இடித்து அப்புறப்படுத்த வேண்டும் என்று கோரிக்கைகள் எழுந்தன.

தொடர்ச்சியாக இதுபற்றி கோரிக்கைகள் வந்த நிலையில் மாவட்ட ஆட்சியர் அந்த இரு சுவர்களை இடிக்க உத்தரவிட்டார். இதனால் ஜேசிபி இயந்திரம் கொண்டு சுவர்கள் இடிக்கப்பட்டு சாலைகள் திறந்துவிடப்பட்டன.

மூடப்பட்ட சாலைகள் 24 மணி நேரத்தில் திறக்கப்பட்டதால் அப்பகுதி மக்கள் மகிழ்ச்சி தெரிவித்துள்ளனர்.

From around the web

Trending Videos

Tamilnadu News