நாக சைதன்யாவுடன் இணைந்த பிரியா பவானி சங்கர்!.. நாகார்ஜுனா என்ன பண்றாரு பாருங்க!..

பிரைம் வீடியோவில் வெளியாகி ரசிகர்களிடையே பெரும் வரவேற்பைப் பெற்ற அமானுஷ்ய மர்ம-திரில்லர் வெப் தொடரான ‘தூதா’வின் இரண்டாம் பாகம் ‘தூதா 2’ தற்போது அதிகாரப்பூர்வமாக தயாரிப்பில் இணைந்துள்ளது. இந்த அறிவிப்பு வெளியாகியுள்ள நிலையில், தொடரின் பூஜை விழா புகைப்படங்களும் சமூக வலைதளங்களில் வைரலாகி வருகின்றன.

முதல் சீசனில் பத்திரிகையாளர் சாகர் கதாபாத்திரத்தில் நடித்த நடிகர் நாக சைதன்யா, இரண்டாம் பாகத்திலும் அதே வேடத்தில் மீண்டும் நடிக்கிறார். இதன் மூலம் ரசிகர்களின் எதிர்பார்ப்பு மேலும் அதிகரித்துள்ளது. அதுமட்டுமின்றி, இந்தத் தொடரின் மூலம் நாக சைதன்யா தயாரிப்பாளராகவும் புதிய பயணத்தைத் தொடங்குவது குறிப்பிடத்தக்கது.

முதல் சீசன், ஊழல் மற்றும் சர்ச்சைகளில் சிக்கியிருந்த பத்திரிகையாளர் சாகரின் வாழ்க்கையை மையமாகக் கொண்டு நகர்ந்தது. எதிர்காலத்தில் நிகழவிருக்கும் துயரமான மரணங்களை முன்னறிவிக்கும் இரத்தக்கறை படிந்த செய்தித்தாள் துணுக்குகள் அவரை வந்தடையத் தொடங்கியபோது, அவரது வாழ்க்கை தலைகீழாக மாறுகிறது. அந்த மர்மத்தின் பின்னணியில் இருக்கும் பழிவாங்கும் ஆவி, மறைக்கப்பட்ட உண்மைகள் மற்றும் சாகரின் சொந்த கடந்தகாலம் ஆகியவை இணைந்து பரபரப்பான திரைக்கதையை உருவாக்கின.

இப்போது உருவாகும் ‘தூதா 2’ சீரிஸை மீண்டும் இயக்குநர் விக்ரம் குமார் இயக்குகிறார். முதல் சீசனின் இருண்ட, பதட்டம் நிறைந்த மற்றும் புலனாய்வு அம்சங்களை சிறப்பாக கையாள்ந்த அவர், இரண்டாம் பாகத்திலும் அதே தரத்தைத் தொடரவுள்ளார் என எதிர்பார்க்கப்படுகிறது.

மேலும், ரசிகர்களின் கவனத்தை ஈர்த்த முக்கிய கதாபாத்திரங்களான டிசிபி கிராந்தி ஷெனாய் வேடத்தில் பார்வதி மற்றும் ப்ரியா அவுதுரி கதாபாத்திரத்தில் பிரியா பவானி சங்கர் மீண்டும் நடிக்க உள்ளனர். இசையமைப்பாளர் ஜாக்ஸ் பிஜோய் மீண்டும் இந்தத் தொடருக்கு பின்னணி இசையமைக்க உள்ளார் என எதிர்பார்க்கப்படுகிறது. முதல் சீசனில் அவரது இசை மர்மம் மற்றும் திகில் உணர்வுகளை மேலும் வலுப்படுத்தியிருந்ததால், இரண்டாம் பாகத்திலும் அதே மாயாஜாலத்தை ரசிகர்கள் எதிர்நோக்கி உள்ளனர்.

ஹைதராபாத்தில் அமைந்துள்ள அன்னபூர்னா ஸ்டூடியோ வளாகத்தில்  பூஜையுடன் படப்பிடிப்பு தொடங்கப்பட்டது. இந்த நிகழ்வில் மூத்த நடிகர் நாகார்ஜுனா சிறப்பு விருந்தினராக கலந்து கொண்டு படக்குழுவினருக்கு வாழ்த்துத் தெரிவித்தார். பூஜை நிகழ்வின் புகைப்படங்கள் தற்போது ரசிகர்களிடையே அதிக கவனத்தைப் பெற்று வருகின்றன.