சர்வம் மாயா செம ஹிட்.. நிவின் பாலியின் ‘ஏழு கடல் ஏழு மலை’ ரிலீஸுக்கு ரெடியாம்!

இயக்குநர் ராம் இயக்கத்தில் உருவாகியுள்ள ‘ஏழு கடல் ஏழு மலை’ திரைப்படம், கடந்த 2025ஆம் ஆண்டு மார்ச் மாதமே வெளியாகும் என அறிவிக்கப்பட்டிருந்தது. ஆனால் பல்வேறு காரணங்களால் அதன் வெளியீடு தாமதமாகி, நீண்ட நாட்களாக எந்தவொரு அதிகாரப்பூர்வ தகவலும் வெளியாகாமல் இருந்தது.

இந்நிலையில், தற்போது இந்த படத்தை மிக விரைவில் திரையரங்குகளில் வெளியிடத் திட்டமிட்டுள்ளதாக தயாரிப்பு தரப்பில் இருந்து தகவல் வெளியாகியுள்ளது.

இந்தப் படத்தை சுரேஷ் காமாட்சி தயாரித்து வருகிறார். இதில் நிவின் பாலி, அஞ்சலி, சூரி உள்ளிட்டோர் முக்கிய கதாபாத்திரங்களில் நடித்துள்ளனர். மேலும், யுவன் சங்கர் ராஜா இசையில் உருவான இப்படத்தின் பாடல்கள் ரசிகர்களிடையே ஏற்கனவே நல்ல வரவேற்பைப் பெற்றுள்ளன.

இப்படம் Rotterdam மற்றும் Moscow போன்ற சர்வதேச திரைப்பட விழாக்களில் திரையிடப்பட்டு, வெளிநாட்டு ரசிகர்களிடமும் விமர்சகர்களிடமும் பாராட்டுகளை பெற்றுள்ளது. நிவின் பாலி நடித்த சர்வம் மாயா திரைப்படம் 150 கோடி வசூல் ஈட்டிய நிலையில், அவரது படங்களின் ரிலீஸில் இருந்த சிக்கல்கள் தீர்ந்துள்ளதாக கூறுகின்றனர்.

கதைக்களத்தைப் பொருத்தவரை, ஒரு சாதாரண மனிதன் மற்றும் மர்மமான அம்சங்கள் கொண்ட சில கதாபாத்திரங்கள் இடையே நடைபெறும் விசித்திரமான சம்பவங்களை மையமாகக் கொண்டு, ரயில் பயணத்தை பின்னணியாகக் கொண்ட ஒரு தனித்துவமான கற்பனை கலந்த திரில்லர் கதையாக இப்படம் உருவாகியுள்ளது.

மேலும், இயக்குநர் ராம் அவர்களின் ”கற்றது தமிழ்” போன்ற படங்களில் காணப்படும் ரியலிஸ்டிக் மற்றும் ஆழமான உணர்ச்சி அணுகுமுறை, இந்த படத்திலும் இடம்பெறும் என ரசிகர்கள் அதிக எதிர்பார்ப்பில் உள்ளனர்.

இந்நிலையில், கோல்டன் ஸ்பாரோ நிறுவனம் இந்த படத்தின் திரையரங்க வெளியீட்டு உரிமையை பெற்றுள்ளதாக அதிகாரப்பூர்வமாக அறிவிக்கப்பட்டுள்ளது.

இதனால், நீண்டநாள் காத்திருந்த ரசிகர்களுக்கு மகிழ்ச்சி அளிக்கும் விதமாக, ‘ஏழு கடல் ஏழு மலை’ திரைப்படம் மிக விரைவில் திரையரங்குகளில் வெளியாகும் என எதிர்பார்க்கப்படுகிறது. அப்படியே சியான் விக்ரமின் துருவ நட்சத்திரம் படத்துக்கும் ஏதாவது வழி பிறந்தால் நல்லா இருக்கும்.