×

கொரோனாவில் முதல் இரண்டு இடத்தை பிடித்த மாநிலங்கள்!

நேற்றைய தினம் பல்வேறு மாநிலங்களில் கொரோனா வைரஸ் பாதிப்பு புதிய உச்சம் தொட்டுள்ளது. தலைநகர் டெல்லியில் நேற்றைய தினம் புதிய உச்சமாக 472 பேருக்கு கொரோனா வைரஸ் பாதிப்பு ஏற்பட்டுள்ளது. 

 

இந்தியாவின் மொத்த பாதிப்பு 80,000ஐ தாண்டியுள்ளது. நாடு முழுவதும் புதிதாக 3,995 பேருக்கு வைரஸ் தொற்று கண்டறியப்பட்டுள்ளது. இது இரண்டாவது அதிகபட்ச பாதிப்பு என்பது குறிப்பிடத்தக்கது. தொடர்ந்து 5வது நாளாக 3,500க்கும் மேற்பட்டோர் வைரஸ் பாதிப்பிற்கு ஆளாகியுள்ளனர். இந்த காலக்கட்டத்தில் பாதிப்பின் வளர்ச்சி விகிதம் படிப்படியாக குறைந்துள்ளது. இருப்பினும் பல்வேறு மாநிலங்களில் கொரோனா வைரஸ் ஆட்டிப் படைத்துக் கொண்டிருக்கிறது.

மகாராஷ்டிர மாநிலத்தில் புதிய உச்சமாக நேற்றைய தினம் 1,602 பேருக்கு வைரஸ் பாதிப்பு ஏற்பட்டுள்ளது. இம்மாநிலத்தில் மொத்த பாதிப்பு 27,524ஆகவும், டெல்லியில் 8,470ஆகவும் இருக்கிறது. மத்தியப் பிரதேசத்தில் புதிதாக 314 பேருக்கும், ராஜஸ்தானில் 206 பேருக்கும் வைரஸ் தொற்று கண்டறியப்பட்டுள்ளது.

புலம்பெயர் தொழிலாளர்கள் வருகையால் வடகிழக்கு மாநிலங்களில் வைரஸ் பாதிப்பு படிப்படியாக அதிகரிக்கும் சூழல் ஏற்பட்டுள்ளது. கேரளாவில் நேற்றைய தினம் புதிதாக 26 பேருக்கு கொரோனா பாதிப்பு இருப்பது கண்டறியப்பட்டது.

இம்மாநிலத்தில் கடந்த மார்ச் மாத இறுதிக்கு பிறகு இதுவே மிகப்பெரிய உயர்வு என்பது குறிப்பிடத்தக்கது. கொரோனா வைரஸ் பாதிப்பில் குஜராத் மாநிலத்தை முந்திச் சென்று தமிழ்நாடு இரண்டாம் இடத்தை பிடித்துள்ளது.

இருப்பினும் இரண்டு மாநிலங்களிலும் வைரஸ் தொற்று படிப்படியாக குறையத் தொடங்கியுள்ளது. கடந்த சில வாரங்களில் முதல்முறையாக 500க்கும் குறைவான பாதிப்பு தமிழ்நாட்டில் பதிவாகியுள்ளது.

நேற்றைய தினம் தமிழ்நாட்டில் 447 பேருக்கும், குஜராத்தில் 324 பேருக்கும் வைரஸ் பாதிப்பு கண்டறியப்பட்டுள்ளது. மாநில அரசுகளின் தகவலின் படி, இந்தியாவின் மொத்த பாதிப்பு 82,085ஆக இருக்கிறது. இரண்டு நாட்களுக்கு பிறகு பலி எண்ணிக்கை இரண்டு இலக்கமாக(99) சரிந்துள்ளது.

ஜார்க்கண்டில் புதிதாக 22 பேருக்கு வைரஸ் பாதிப்பு ஏற்பட்டு புதிய உச்சத்தை தொட்டுள்ளது. கடந்த 5ஆம் தேதியில் இருந்து வைரஸ் தொற்று உறுதி செய்யப்பட்ட 95 பேரில் 80 பேர் புலம்பெயர் தொழிலாளர்கள் ஆவர்.

வெளிமாநிலத்தில் இருந்து தொழிலாளர்கள் திரும்பியதால் கொரோனா பாதிப்பு உயர்ந்த மற்றொரு மாநிலம் ஒடிசா ஆகும். நேற்றைய தினம் புதிதாக 86 பேருக்கு வைரஸ் தொற்று கண்டறியப்பட்டுள்ளது. இதன்மூலம் அம்மாநிலத்தில் மொத்த பாதிப்பு 624ஆக அதிகரித்துள்ளது.
 

From around the web

Trending Videos

Tamilnadu News