மகுடம் ஃபர்ஸ்ட் சிங்கிள் வரப்போகுது!.. ஜி.வி. பிரகாஷ் உடன் விஷால் என்ன சொல்றாரு பாருங்க!..

தமிழ் சினிமாவின் முன்னணி நடிகர்களில் ஒருவரான விஷால், தனது 35-வது திரைப்படமான ‘மகுடம்’ படத்தின் மூலம் இயக்குநராகவும் புதிய அவதாரம் எடுக்கிறார்.  ஏற்கனவே நடிகர், தயாரிப்பாளர் என பல துறைகளில் தனது திறமையை நிரூபித்துள்ள விஷால், தற்போது இயக்குநர் பொறுப்பையும் ஏற்று ரசிகர்களின் கவனத்தை ஈர்த்துள்ளார். இந்நிலையில் அப்படத்தின் அடுத்த அப்டேட் வெளியாகியுள்ளது.

தமிழ் மற்றும் தெலுங்கு மொழிகளில் பிரம்மாண்டமாக உருவாகி வரும் ‘மகுடம்’ திரைப்படத்தில் விஷால் மூன்று வித்தியாசமான கதாபாத்திரங்களில் நடித்திருப்பதாக தகவல்கள் வெளியாகியுள்ளன. அவருக்கு ஜோடியாக துஷாரா விஜயன் நடித்துள்ள நிலையில், நடிகை அஞ்சலி மற்றும் இசையமைப்பாளரும் நடிகருமான ஜி.வி. பிரகாஷ் முக்கிய கதாபாத்திரங்களில் இடம்பெற்றுள்ளனர்.

முதலில் இயக்குநர் ரவி அரசு இந்த படத்தை இயக்குவதாக அறிவிக்கப்பட்டிருந்தது. ஆனால் சில கருத்து வேறுபாடுகள் காரணமாக அவர் திட்டத்திலிருந்து விலகியதைத் தொடர்ந்து, படத்தின் முழுப் பொறுப்பையும் விஷால் ஏற்று இயக்கத் தொடங்கினார். இதன் மூலம் நடிகராக மட்டுமல்லாமல் இயக்குநராகவும் தனது திறமையை நிரூபிக்க தயாராகி வருகிறார்.

பிரபல தயாரிப்பு நிறுவனமான சூப்பர் குட் பிலிம்ஸ் தயாரித்து வரும் இந்த திரைப்படத்தின் அதிகாரப்பூர்வ டீசர் சமீபத்தில் வெளியாகி ரசிகர்களிடையே நல்ல வரவேற்பைப் பெற்றது. டீசரில் இடம்பெற்ற அதிரடி காட்சிகள் மற்றும் விஷாலின் வித்தியாசமான தோற்றங்கள் படத்தின் மீதான எதிர்பார்ப்பை அதிகரித்துள்ளன.

இதற்கிடையில், படத்தின் முதல் பாடலான ‘ரைஸ் ஆஃப் லிங்கா’ விரைவில் வெளியாகும் என படக்குழு அறிவித்துள்ளது. ராப் பாணியில் உருவாகியுள்ள இந்த பாடல் படத்தின் முக்கிய அம்சங்களில் ஒன்றாக கருதப்படுகிறது. மேலும், இந்த பாடலின் மூலம் ராப் பாடகர் வினோத் தமிழ் திரையுலகில் அறிமுகமாகிறார் என்பது குறிப்பிடத்தக்கது. பெரும் எதிர்பார்ப்பை ஏற்படுத்தியுள்ள ‘மகுடம்’ திரைப்படம் 2026 ஜூலை மாதத்தில் உலகம் முழுவதும் திரையரங்குகளில் வெளியாக உள்ளது.