Pookie Review: காதலும் மோதலும் கலந்த பூக்கி- விமர்சனம்

விஜய் ஆண்டனியின் தயாரிப்பில், கணேஷ் சந்திரா இயக்கத்தில் இளமைத் துள்ளலுடன் வெளியாகியிருக்கும் திரைப்படம் ‘பூக்கி’. அஜய் தீஷன், தனுஷா எனப் புதிய முகங்களுடன் பாண்டியராஜன், விவேக் பிரசன்னா போன்ற அனுபவ நட்சத்திரங்களும் இணைந்து நடித்துள்ளனர்.

ஆறு ஆண்டுகளாகத் தீவிரமாகக் காதலித்து வரும் கைலாஷ் (அஜய் தீஷன்) மற்றும் ஆழி (தனுஷா), ஒருவரையொருவர் செல்லமாக ‘பூக்கி’ என அழைத்துக்கொள்கிறார்கள். ஒரு பயணத்தின் போது இருவருக்கும் இடையே வெடிக்கும் மோதல், கைகலப்பாக மாறுகிறது. இதைச் சுற்றியுள்ளவர்கள் வீடியோ எடுத்து சமூக வலைதளங்களில் வைரலாக்க, ஈகோ முட்டி மோதி இருவரும் பிரிகிறார்கள்.

இந்தத் தற்காலிகப் பிரிவுக்குப் பின், அவர்கள் இருவரும் வாழ்க்கையில் முன்னேறிச் சென்றார்களா அல்லது பழைய நினைவுகளில் சிக்கித் தவித்தார்களா? என்பதே இப்படத்தின் கலகலப்பான திரைக்கதை.

இப்படத்திற்கு இசையமைத்து, எடிட்டிங் செய்ததோடு மட்டுமல்லாமல், ஒரு பாடலுக்கு நடனமாடியும், இடைவேளையில் ரசிகர்களுடன் உரையாடியும் ‘கேமியோ’ பாத்திரத்தில் அப்ளாஸ் வாங்குகிறார் விஜய் ஆண்டனி. படம் முழுவதும் நடிகர் சிம்புவின் பழைய பேட்டி வீடியோக்கள் கதையோட்டத்திற்கு ஏற்பப் பயன்படுத்தப்பட்டுள்ளது ஒரு புதுமையான முயற்சி. இது திரையரங்கில் சிரிப்பலைக்கு உத்தரவாதம் அளிக்கிறது.

இன்றைய காலத்து காதலர்களுக்கே உரிய அந்தத் தவிப்பையும், குழப்பத்தையும் அஜய் தீஷன் மற்றும் தனுஷா மிக நேர்த்தியாகப் பிரதிபலித்துள்ளனர்.ஆனால் படத்தின் நீளம் ஒரு கட்டத்திற்கு மேல் பொறுமையைச் சோதிக்கிறது. எடிட்டிங்கில் இன்னும் சில காட்சிகளைக் குறைத்திருந்தால் படம் கூடுதல் வேகத்தைப் பெற்றிருக்கும்.

பிரதான காதலைத் தாண்டி அரசியல், மோசடிச் சாமியார்கள் எனப் பல விஷயங்களைத் தொட முயன்றதில், படத்தின் மையக்கரு சிதறுவது போலத் தெரிகிறது.
சிம்புவின் வீடியோக்கள் மற்றும் ஏஐ காட்சிகள் சில இடங்களில் சுவாரஸ்யமாக இருந்தாலும், அவை திரும்பத் திரும்ப வருவது சலிப்பை ஏற்படுத்துகிறது.
தேவையற்ற காட்சிகளைத் தவிர்த்துப் பார்த்தால், இன்றைய தலைமுறை காதலர்களின் மனநிலையைத் திரையில் பார்க்க விரும்புபவர்களுக்கு ‘பூக்கி’ ஒரு நல்ல சாய்ஸ். குறிப்பாக இந்த காதலர் தினக் கொண்டாட்டத்திற்கு ஏற்ற ஒரு ‘கலர்ஃபுல்’ பொழுதுபோக்குத் திரைப்படம் இது.