குபேரா Vs DNA!.. உசுர கொடுத்து நடிச்சும் யூஸ் இல்லயே!.. அசால்ட்டா ஸ்கோர் பண்ணிய அதர்வா!

Kubera Vs DNA: ஜூன் 20ம் தேதியான இன்று தனுஷின் குபேரா மற்றும் அதர்வாவின் DNA ஆகிய படங்கள் வெளியாகியுள்ளது. இதில், குபேரா படத்திற்கு அதிக எதிர்பார்ப்பு இருந்தது. ஏனெனில் தனுஷ், நாகர்ஜுனா போன்ற பெரிய நடிகர்கள் அதில் இருக்கிறார்கள். அதோடு, அதிக பட்ஜெட், தமிழ், தெலுங்கு, ஹிந்தி என 3 மொழிகளில் ரிலீஸ், பெரிய அளவில் புரமோஷன் என ஹைப் ஏற்றினார்கள். புரமோஷன் விழாவில் தனுஷ் பன்ச் வசனமெல்லாம் பேசினார்.

தெலுங்கு பட இயக்குனர் சேகர் கம்முலா இப்படத்தை இயக்கியுள்ளார். ஒரு பிராஜெக்டை பெறுவதற்காக பிச்சைக்காரர்கள் சிலரை பினாமியாக்கி பணம் கைக்கு வந்ததும் அவர்களை கொலை செய்ய திட்டமிடுகிறார் ஒரு கார்ப்பரேட் வில்லன். இது தெரியாமல் அவருக்கு உதவ வருகிறார் நாகர்ஜுனா. அவர்கள் தேர்ந்தெடுக்கும் பிச்சைக்காரர்களில் தனுஷும் சிக்க உயிருக்கு பயந்து அவர் ஓடும் ஓட்டம்தான் குபேரா.

இந்த படத்தில் தனுஷ் பல இடங்களில் சிறப்பாகவே நடித்திருக்கிறார். கதாபாத்திரத்தின் தன்மையை உணர்ந்து வாழ்ந்து காட்டியிருக்கிறார். படத்தின் முதல் பாதி நன்றாகவே போகிறது. நல்ல கதை. நாகார்ஜுனா, ராஷ்மிகா ஆகியோர் நன்றாகவே நடித்திருக்கிறார்கள். ஆனால், படத்தில் நிறைய மைனஸ் இருக்கிறது. படத்தின் இரண்டாம் பாதியில் சொதப்பி இருக்கிறார்கள். மேலும், இயல்பாக கதை நகரும்போது ஃப்ரி கிளைமேக்ஸ் மற்றும் கிளைமேக்ஸில் உள்ள செயற்கைத்தனம் ரசிகர்களுக்கு அதிருப்தியை ஏற்படுத்தியிருக்கிறது.

படத்தின் முடிவு சரியாக அமைக்கப்படவில்லை. அதோடு, படத்தின் 3 மணி நேர நீளமும் ரசிகர்களை சோதிக்கிறது. அதோடு இயக்குனர் தெலுங்கு என்பதால் ஒரு டப்பிங் படம் பார்ப்பது போல ஒரு உணர்வு வருகிறது. ஆனால், இந்த படத்தோடு வெளியாகியுள்ள DNA படம் நல்ல பாசிட்டிவான விமர்சனங்களை பெற்று வருகிறது. இது நேரடியான தமிழ்படம். இந்த படத்திற்கு பெரிய அளவில் புரமோஷன் செய்யப்படவில்லை.

இந்த படத்தை ஒரு நாள் ஒரு கூத்து படத்தை இயக்கிய நெல்சன் வெங்கடேசன் இயக்கியுள்ளார். கணவன் மனைவிக்குள் இருக்கும் அழகான உறவு மற்றும் அதோடு திரில்லர் கலந்து இப்படத்தை கொடுத்திருக்கிறார். இந்த படம் நன்றாக இருப்பதாக பலரும் கூறி வருகிறார்கள். அதர்வாவுக்கு இது ஒரு செம கம்பேக் எனவும், செமையாக நடித்திருக்கிறார் எனவும் ரசிகர்கள் சமூகவலைத்தளங்களில் பதிவிட்டு வருகின்றனர். குறிப்பாக குடும்பத்தோடு பார்க்க வேண்டும், பெண்களுடன் ஆண்களும் தியேட்டருக்கு சென்று இப்படத்தை பார்க்கவேண்டும் எனவும் பலரும் சொல்லி வருகிறார்கள். இப்படத்தில் நடித்துள்ள நிமிஷாவுக்கும் பாராட்டுகள் குவிந்து வருகிறது.

அதோடு, துவக்கம் முதல் இறுதி வரை படம் எங்கும் போரடிக்கவில்லை. கதை, திரைக்கதை நேர்த்தியாக இருக்கிறது. எல்லோரின் நடிப்பும் அபாரமாக இருக்கிறது. கிப்ரானின் இசையும் பின்னணி இசையும் சிறப்பாக இருப்பதாக பலரும் சொல்கிறார்கள். குபேரா படம் போல சில நெகட்டிவான விமர்சனங்களை DNA படம் பெறவில்லை என்பதுதான் முக்கியமானதாக பார்க்கப்படுகிறது. இரண்டு படங்களுக்கும் வந்திருக்கும் விமர்சனங்களை பார்க்கும்போது தமிழகத்தில் குபேராவை விடவும் DNA படம் அதிக வசூலை பெற்றாலும் ஆச்சர்யப்படுவதிற்கில்லை.