திடீரென தள்ளிப்போன யஷின் ‘டாக்ஸிக்’ ரிலீஸ்: பின்னணியில் இருக்கும் சீரியஸ் காரணம்

கே.ஜி.எஃப் படத்தின் பிரம்மாண்ட வெற்றிக்குப் பிறகு, நடிகர் யஷ் நடிப்பில் சுமார் 4 ஆண்டுகளாகத் தயாராகி வரும் படம் ‘டாக்ஸிக்’. கீது மோகன்தாஸ் இயக்கத்தில் உருவாகும் இந்தப் படம், வரும் மார்ச் 19-ம் தேதி உலகம் முழுவதும் வெளியாகும் என அறிவிக்கப்பட்டிருந்தது. ஆனால், தற்போது இந்தப் படத்தின் ரிலீஸ் தேதி ஜூன் மாதத்திற்குத் தள்ளிவைக்கப்பட்டுள்ளது ரசிகர்களிடையே பெரும் அதிர்ச்சியை ஏற்படுத்தியுள்ளது. இபடத்தில் யஷ் உடன் நயன்தாரா, கியாரா அத்வானி, ஹூமா குரேஷி மற்றும் ருக்மிணி வசந்த் ஆகியோர் முக்கிய வேடங்களில் நடிக்கின்றனர்.

ரிலீஸ் தேதி மாற்றம்: அதிகாரப்பூர்வ அறிவிப்பு

இன்று (மார்ச் 4, 2026) படக்குழு வெளியிட்டுள்ள அதிகாரப்பூர்வ அறிவிப்பின்படி, டாக்ஸிக் திரைப்படம் வரும் ஜூன் 4, 2026 அன்று வெளியாகும் எனத் தெரிவிக்கப்பட்டுள்ளது. திட்டமிட்ட தேதிக்கு இன்னும் சில நாட்களே இருந்த நிலையில், இந்தத் திடீர் மாற்றம் சினிமா வட்டாரத்தில் பரபரப்பாகப் பேசப்படுகிறது.

காரணம் என்ன?

இந்தப் படத்தின் ரிலீஸ் தள்ளிப்போனதற்கு இரண்டு முக்கிய காரணங்கள் முன்வைக்கப்படுகின்றன:

1. மத்திய கிழக்கு நாடுகளின் பதற்றம்:

படக்குழு வெளியிட்டுள்ள அறிக்கையில், மத்திய கிழக்கு நாடுகளில் (குறிப்பாக ஈரான் – இஸ்ரேல் மோதல்) நிலவி வரும் போர் பதற்றம் மற்றும் நிலையற்ற தன்மையே முக்கியக் காரணமாகக் கூறப்பட்டுள்ளது. வளைகுடா நாடுகள் இந்தியத் திரைப்படங்களுக்குப் பெரிய சந்தையாக இருப்பதால், அங்கு நிலவும் அசாதாரண சூழல் படத்தின் வசூலைப் பாதிக்கும் என விநியோகஸ்தர்கள் கருதுகின்றனர். எனவே, உலகளாவிய வெளியீட்டைக் கருத்தில் கொண்டு இந்த முடிவு எடுக்கப்பட்டுள்ளது.

2. பாக்ஸ் ஆபீஸ் மோதலைத் தவிர்க்க:

மார்ச் 19-ம் தேதி ரன்வீர் சிங் நடிப்பில் உருவாகியுள்ள பிரம்மாண்ட படமான ‘துரந்தர் 2’ வெளியாகிறது. இரண்டு பெரிய பட்ஜெட் படங்கள் ஒரே நாளில் மோதுவது வசூலைப் பிரிக்கும் என்பதால், ‘டாக்ஸிக்’ படத்தைத் தனித்து ஜூன் மாதத்தில் ரிலீஸ் செய்யப் படக்குழு திட்டமிட்டுள்ளது.