தமிழக அரசியல் களத்தில் பெரும் அதிர்வலைகளை ஏற்படுத்தி வரும் தமிழக வெற்றிக் கழகத்தின் தலைவர் விஜய், இன்று தஞ்சாவூர் மாவட்ட தவெக நிர்வாகிகளுடன் ஆலோசனை நடத்துகிறார். செங்கிப்பட்டி அருகே உள்ள அய்யாசாமிப்பட்டியில் சுமார் 10 ஏக்கர் பரப்பளவில் நடைபெறும் இந்த பிரம்மாண்ட கூட்டத்தில், தஞ்சாவூர் மாவட்டத்தின் 8 சட்டமன்றத் தொகுதிகளைச் சேர்ந்த சுமார் 4,900 நிர்வாகிகள் கலந்து கொள்கின்றனர்.
விவாகரத்து விவகாரம்: பேசுவாரா அல்லது மௌனம் காப்பாரா?
கடந்த பிப்ரவரி 27-ம் தேதி, விஜய்யின் மனைவி சங்கீதா செங்கல்பட்டு குடும்ப நல நீதிமன்றத்தில் விவாகரத்து மனு தாக்கல் செய்துள்ளதாக செய்திகள் வெளியாகி தமிழகத்தையே உலுக்கின. 25 ஆண்டுகால திருமண வாழ்க்கையில் விரிசல் ஏற்பட்டுள்ளதாகவும், இதில் சில கடுமையான குற்றச்சாட்டுகள் முன்வைக்கப்பட்டுள்ளதாகவும் தகவல்கள் கசிந்தன.
இந்தச் சூழலில், செங்கல்பட்டு நீதிமன்றத்தில் சங்கீதா விவாகரத்து மனு தாக்கல் செய்த பிறகு விஜய் பங்கேற்கும் முதல் பொதுக்கூட்டம் என்பதால் தஞ்சை கூட்டத்தில் விஜய் இது குறித்து ஏதேனும் விளக்கம் அளிப்பாரா என்ற கேள்வி எழுந்துள்ளது. பொதுவாக தனது தனிப்பட்ட விஷயங்களைப் பொதுமேடையில் பகிராத விஜய், தற்போது அரசியலில் முழுமையாக இறங்கியுள்ளதால், எதிர்த்தரப்பினரின் விமர்சனங்களுக்கு முற்றுப்புள்ளி வைக்க இந்த மேடையைப் பயன்படுத்துவாரா என்ற எதிர்பார்ப்பு நிலவுகிறது. இருப்பினும், கட்சி வட்டாரங்கள் இது முழுக்க முழுக்க 2026 தேர்தலுக்கான ஆலோசனைக் கூட்டம் என்பதால், அரசியல் விவகாரங்களுக்கு மட்டுமே முக்கியத்துவம் அளிக்கப்படும் எனத் தெரிவிக்கின்றன.
தேர்தலை நோக்கிய வியூகம்
விஜய் இன்று காலை தனது சென்னை இல்லத்திலிருந்து புறப்பட்டு தஞ்சை வந்தடைந்தார். இக்கூட்டத்தில் 2026 சட்டமன்றத் தேர்தலை எதிர்கொள்வது, உறுப்பினர் சேர்க்கையை வலுப்படுத்துவது மற்றும் ‘விசில்’ சின்னத்தை மக்களிடம் கொண்டு சேர்ப்பது குறித்து விரிவாக ஆலோசிக்கப்பட உள்ளது. குறிப்பாக, காவிரி டெல்டா மாவட்டமான தஞ்சையில் விவசாயிகளின் பிரச்சனைகள், மேகதாது அணை விவகாரம் போன்றவற்றை மையமாக வைத்து விஜய் தனது உரையை நிகழ்த்துவார் என எதிர்பார்க்கப்படுகிறது.
பலத்த போலீஸ் பாதுகாப்பு
சுமார் 52 நிபந்தனைகளுடன் காவல்துறை இந்தக் கூட்டத்திற்கு அனுமதி அளித்துள்ளது. QR கோடு ஸ்கேன் செய்யப்பட்ட அடையாள அட்டைகள் வைத்திருப்பவர்கள் மட்டுமே உள்ளே அனுமதிக்கப்படுகின்றனர். தவெக பொதுச்செயலாளர் என். ஆனந்த் மற்றும் நிர்வாகிகள் கடந்த சில நாட்களாகவே அந்தப் பகுதியில் முகாமிட்டு பாதுகாப்பு மற்றும் வசதிகளைக் கவனித்து வருகின்றனர்.
தனிப்பட்ட வாழ்வில் எழுந்துள்ள சவால்கள் விஜய்யின் அரசியல் செல்வாக்கை பாதிக்குமா அல்லது “பாதிக்கப்பட்டவர்” என்ற பிம்பம் அவருக்கு சாதகமாக அமையுமா என்பதை இக்கூட்டத்திற்குப் பிறகான மக்களின் எதிர்வினை தீர்மானிக்கும்.
சாய் விகாஷ். இவர் டிஜிட்டல் செய்தி துறையில் துறையில் 15 ஆண்டுகள் அனுபவம் பெற்றவர். குறிப்பாக தமிழில் முன்னணி பத்திரிக்கைகளின் இணையதள் அசெய்தி பிரிவில் ஆசிரியராக பணியாற்றிய அனுபவம் கொண்டவர். சினிமா, அரசியல் சார்ந்த செய்திகள் வழங்குவதில் ஆர்வம் உள்ளவர்
மின் அஞ்சல் முகவரி cinereportrs@gmail.com