The Raja Saab: அடேய் காப்பாத்துங்க என்னைய… பிரபாஸுக்கு இது இன்னொரு சான்ஸ்… தி ராஜா சாப் டீசர் எப்படி இருக்கு?
The Raja Saab: பிரபல நடிகர் பிரபாஸ் நடிப்பில் அடுத்து வெளியாக இருக்கும் தி ராஜா சாப் படத்தின் டீசர் பிரம்மாண்டமாக வெளியிடப்பட்டிருக்கும் நிலையில் சமூக வலைதளத்தில் வைரல் ஆகி வருகிறது.
யூவி கிரியேஷன் தயாரிப்பில் மருத்து தசாரி இயக்கத்தில் உருவாகி வரும் திரைப்படம் தி ராஜா சாப். இப்படத்தில் பிரபாஸ், ரிஷப் ஷெட்டி, மாளவிகா மோகனன், நிதி அகர்வால் உள்ளிட்டோர் முக்கிய இடத்தில் நடித்து வருகின்றனர்.
ஹாரர் மற்றும் ஆக்ஷன் கலவையில் இப்படம் உருவாக்கப்பட்ட இருப்பதால் ரசிகர்களிடம் மிகப்பெரிய எதிர்பார்ப்பை உருவாக்கி இருக்கிறது. இப்படத்திற்கு பிரபல இசையமைப்பாளர் தமன் இசையமைத்து இருக்கிறார்.
வரும் டிசம்பர் 5ஆம் தேதி வெளியாக இருக்கும் இப்படத்தின் டீசர் தற்போது பிரம்மாண்டமாக வெளியிடப்பட்டிருக்கிறது. பொதுவாக தெலுங்கு திரைப்படங்கள் ஹாரர் கலவையில் வெளியாகும் போது நல்ல வரவேற்பை பெறும். அந்த வகையில் இத்திரைப்படமும் அருந்ததி படம் போன்ற மிகப்பெரிய வெற்றியை பெரும் என்று ரசிகர்களால் எதிர்பார்க்கப்பட்டு வருகிறது.
இந்நிலையில் வெளியிடப்பட்டிருக்கும் டீசரில் அமானுஷ்ய விஷயங்களும், ஆக்ஷன் சண்டைக் காட்சிகளும் பிரம்மாண்டமாக அமைக்கப்பட்டிருக்கிறது. காதல் காட்சிகள் டீசரில் இடம்பெற்று இருப்பதால் நிதி அகர்வால் மற்றும் மாளவிகா என இருவருமே பிரபாஸுக்கு ஜோடியாக இருக்கலாம்.
அதுமட்டுமில்லாமல் இப்படத்தின் விஷுவல் மிகப் பிரம்மாண்டமாக அமைக்கப்பட்டிருக்கிறது. கிட்டதட்ட பாகுபலி திரைப்படத்தை தொடர்ந்து பிரபாஸிற்கு மிகப் பெரிய வெற்றிப் படம் இதுவரை அமையவில்லை.
சூப்பர் ஹிட் அடிக்கும் என எதிர்பார்க்கப்பட்ட சலார் திரைப்படம் ரசிகர்களிடம் கலவையான விமர்சனங்களையே பெற்றது குறிப்பிடத்தக்கது. இந்நிலையில் தற்போது வெளியாகி இருக்கும் தி ராஜா சாப் படத்தின் டீசர் ரசிகர்களிடம் நல்ல வரவேற்பை பெற்று வருகிறது.