ஒருபக்கம் விஜய் அரசியல் நடவடிக்கைகளில் ஈடுபட துவங்கிவிட்டாலும் சினிமாவில் விஜயை ரசிக்கும் ரசிகர்கள் ஆவலுடன் எதிர்பார்க்கும் படமாக ஜனநாயகன் இருக்கிறது. இந்த படம் 2026 ஜனவரி 9ம் தேதி உலகமெங்கும் ரிலீஸாகவிருக்கிறது. தெலுங்கில் பாலையா நடிப்பில் வெளியாகி வெற்றி பெற்ற பகவந்த் கேசரி படத்தின் தமிழ் ரீமேக்காக ஜனநாயகன் உருவாகியிருக்கிறது. சமீபத்தில் தளபதி கச்சேரி என்கிற பெயரில் ஜனநாயகன் படத்தின் பாடல் லிரிக் வீடியோவையும் படக்குழு வெளியிட்டது.
ஒருபக்கம், ஜனநாயகன் படத்தின் வியாபாரம் சூடுபிடித்திருக்கிறது. தமிழ் சினிமா உலகில் பெரிய ரிக்கார்ட்டை ஜனநாயகன் பட வியாபாரம் செய்யும் என டிரேடிங் வட்டாரத்தில் சொல்கிறார்கள். ஏற்கனவே படத்தின் தமிழக மற்றும் கேரள தியேட்டர் ரிலீஸ் உரிமை 115 கோடிக்கு விலை போயிருக்கிறது. படத்தின் டிஜிட்டல் உரிமையை அமேசான் நிறுவனம் 110 கோடிக்கு வாங்கி இருக்கிறதாம். மேலும், படத்தின் ஆடியோ உரிமையை T-Series நிறுவனம் 35 கோடிக்கு வாங்கியுள்ளது. இதில் ஆச்சர்யம் என்னவெனில் ஓவர்சீஸ் என சொல்லப்படும் வெளிநாடுகளுக்கான வியாபாரம் களைகட்டியிருக்கிறது.
துபாயில் உள்ள ஃபார்ஸ் என்கிற நிறுவனம் ஜனநாயகன் படத்தின் மொத்த ஓவர் சீஸ் உரிமையை 75 கோடிக்கு வாங்கியுள்ளனர். பெரிய பட்ஜெட்டில் உருவாகும் பெரிய நடிகர்களின் படங்களை இந்த நிறுவனம்தான் வாங்கும் என்கிறார்கள். 75 கோடிக்கு வாங்கி உலகத்தில் உள்ள பல நாடுகளிலும் பிரித்து சுமார் 100 கோடிக்கு விற்றுள்ளனர். ஒவ்வொரு நாட்டிலும் உள்ள பெரிய வினியோகஸ்தர் ஜனநாயகன் பட உரிமயை வாங்கியிருக்கிறாராம்.
இதில், ஆச்சர்யப்பட வேண்டிய தகவல் என்னவெனில் மலேசியாவில் விஜயின் கோட் படத்தின் உரிமை 8.5 கோடிக்கு விற்கப்பட்ட நிலையில், மாலிக்ஸ் ஸ்ட்ரீம்ஸ் என்கிற நிறுவனம் ஜனநாயகனை 12 கோடிக்கு விலை பேசியிருக்கிறார்களாம். இதுவரை எந்த தமிழ் படமும் இவ்வளவு விலை போனதில்லை என்கிறார்கள். அதேநேரம், ஜனநாயகன் படத்தின் இசை வெளியீட்டு விழாவை மலேசியாவில் நடத்த வேண்டும். அப்படி நடத்தினால் 12 கோடி, இல்லையெனில் 11 கோடி என பேசியிருக்கிறார்களாம்.
ஜனநாயகன் படத்தின் இசை வெளியீட்டு விழா மலேசியாவில்தன் நடக்கவுள்ளது என்பதால் 12 கோடி விலை என்பது உறுதியானதாகவே பார்க்கப்படுகிறது. மொத்தத்தில் ஜனநாயகன் படம் வியாபாரத்தில் பல சாதனைகளை படைக்கும் என எதிர்பார்க்கப்படுகிறது.
