ஸ்ரீதர் இயக்கிய விடிவெள்ளி படத்தைத் தயாரித்தது நடிகர் திலகம் சிவாஜிகணேசனும் அவரது நெருங்கிய நண்பருமான முத்துமாணிக்கமும். ஸ்ரீதருக்கு திருமணம் முடிந்த உடன் தம்பதி சமேதராக நீங்க ரெண்டு பேரும் எங்க ஊரான வேட்டைக்காரன்புதூருக்கு வந்து அங்கு ரெண்டு நாள் தங்கி இருக்க வேண்டும் என்று ஸ்ரீதருக்கு அழைப்பு விடுத்தார் முத்துமாணிக்கம். அவர்கள் இருவருக்கும் இடையே நல்ல நட்பு இருந்ததால அவருடைய அழைப்பைத் தட்ட முடியாமல் வேட்டைக்காரன் புதூருக்குப் புறப்பட்டுச் சென்றார் ஸ்ரீதர்.
அங்கு சென்று இருந்த சமயத்தில் தான் ஆழியாறு அணைக்கட்டைப் பார்க்கக்கூடிய வாய்ப்பு ஸ்ரீதருக்குக் கிடைத்தது. மலையின் அடிவாரத்திலே அற்புதமான அந்த அணையை அப்போதுதான் கட்டி முடித்து இருந்தார்கள். அந்த ரம்மியமான சூழலில் மனதைப் பறி கொடுத்த ஸ்ரீதர் இந்த ஆழியாறு அணைக்கட்டை நிலைக்களமாகக் கொண்டு ஒரு காதல் கதையை எழுதிப் படமாக்கினால் எப்படி இருக்கும் என்று சிந்திக்கத் தொடங்கினார்.
அப்படி அவர் சிந்தித்ததன் விளைவாக உருவான ஒரு கதை தான் காதலிக்க நேரமில்லை. அது ஒரு மிகப்பெரிய படமாக அமைந்ததோடு மட்டும் இல்லாமல் ரவிச்சந்திரன் என்கிற ஒரு அற்புதமான கதாநாயகனையும், காஞ்சனா என்கின்ற அற்புதமான ஒரு கதாநாயகியையும் தமிழ் சினிமா உலகிற்குத் தந்தது. மேற்கண்ட தகவலை பிரபல தயாரிப்பாளர் சித்ரா லட்சுமணன் தெரிவித்துள்ளார்.
