Ajithkumar: விடாமுயற்சி படம் சரியாக போகாத நிலையில் ஆதிக் ரவிச்சந்திரன் இயக்கத்தில் அஜித் நடித்த படம்தான் குட் பேட் அக்லி. கதை, லாஜிக் என பெரிதாக ஒன்றுமில்லை என்றாலும் அஜித் ரசிகர்களை திருப்திப்படுத்தும் காட்சிகளை பார்த்து பார்த்து வைத்திருந்தார் ஆதிக் ரவிச்சந்திரன். ஏற்கனவே மார்க் ஆண்டனி ஹிட் கொடுத்த நிலையில் இவர் இயக்கிய அடுத்த படம் குட் பேட் அக்லி.
பக்கா கேங்ஸ்டர் கதையில் அஜித்தை மிகவும் கலர்ஃபுல்லாக காட்டி ரசிக்க வைத்திருந்தார் ஆதிக். ஒவ்வொரு காட்சியிலும் தியேட்டர்களில் விசில் பறந்தது. ஜிவி பிரகாஷ் இசையில் பாடல்களும் மாஸாக அமைந்தது. இந்த படத்தில் அஜித்தின் மனைவியாக திரிஷா நடித்திருந்தார்.
அஜித்துக்கு ஒரு பழக்கம் உண்டு. ஒரு இயக்குனரை பிடித்துவிட்டால் அவரின் இயக்கத்தில் தொடர்ந்து நடிப்பார். ஏற்கனவே சிறுத்தை சிவா, ஹெச்.வினோத் ஆகியோரின் இயக்கங்களில் அப்படி நடித்திருக்கிறார். அந்தவகையில் அஜித்தின் அடுத்த படத்தையும் ஆதிக் ரவிச்சந்திரனே இயக்கவுள்ளார்.
குட் பேட் அக்லி படத்தை தயாரித்த மைத்ரி மூவி மேக்கர்ஸ் நிறுவனத்தோடு ஆதிக்குக்கு முட்டிக்கொண்டதால் இந்த படத்தை அந்நிறுவனம் தயாரிக்கவில்லை. இப்போது இந்த படத்தை ஐசரி கணேஷின் வேல்ஸ் இண்டர்நேஷனல் நிறுவனம் தயாரிக்கவுள்ளதாக செய்திகள் கசிந்திருக்கிறது.
வருகிற நவம்பர் மாதம் படப்பிடிப்பு துவங்கி மார்ச் மாதத்திற்குள் படப்பிடிப்பை முடிக்க திட்டமிட்டுள்ளனர். எனவே படம் அஜித்தின் பிறந்தநாளான 2026 மே 1ம் தேதி வெளியாகலாம். ஒருவேளை இது நடக்கவில்லை எனில் ஜூன் மாதம் வெளியாகும் என சொல்லப்படுகிறது. இந்த படத்தில் கேஜிஎப், கோப்ரா போன்ற படங்களில் நடித்த ஸ்ரீதி ஷெட்டி நடிக்க வாய்ப்பிருப்பதாக சொல்லப்படுகிறது.
அக்டோபர் மாதம் வரை அஜித் கார் ரேஸில் கலந்துகொள்ளவிருக்கிறார். அதன்பின் நவம்பர் முதல் பிப்ரவரி மாதம் வரை நடித்துவிட்டு மார்ச் மாதம் மீண்டும் கார் ரேஸில் கலந்துகொள்ளவிருக்கிறார்.
