இசைப்புயல் என்று இன்று எல்லாரும் கொண்டாடிக் கொண்டு இருக்கின்ற ஏஆர்.ரகுமான் தமிழ்சினிமா உலகில் ஒரு புயலைப் போல் தான் நுழைந்தார் என்பது நாம் அறிந்த விஷயம். அறிமுகமான முதல் படத்திலேயே வெற்றிகளைக் குவிக்கக்கூடிய வாய்ப்பு அவருக்கு அமைந்தது. அதன் காரணமாக இந்தியில் அவரது பாடல்களைப் பலரும் காப்பி அடிக்கத் தொடங்கினர். அதை எல்லாம் தடுப்பதற்கு ஏஆர்.ரகுமான் எவ்வளவோ முயற்சி பண்ணிப் பார்த்தார்.
ஆனால் அவரால் முடியவில்லை. அப்படிப்பட்ட சூழலில் இந்திப்படங்களுக்கு நேரடியாக இசை அமைத்தால் தான் இது போன்ற பிரச்சனைகளுக்கு முடிவு கட்ட முடியும் என்று ஒரு காலகட்டத்தில் முடிவு எடுத்தார். அப்படிப்பட்ட சூழலில் தான் ராம்கோபால் வர்மாவின் ரங்கீலா என்ற இந்திப்படத்துக்கு இசை அமைக்கக்கூடிய வாய்ப்பு வந்தது. ரங்கீலா பாடல்கள் இந்தியா முழுமைக்கும் எப்படிப்பட்ட ஒரு வெற்றியை அடைந்தது என்பது எல்லாரும் அறிந்த விஷயம்.
அந்தப் படத்தின் வெற்றியைத் தொடர்ந்து ஏராளமான இந்திப்படத்துக்கு இசை அமைக்கக்கூடிய வாய்ப்பு ஏஆர்.ரகுமானைத் தேடி வந்தது. இன்று இந்திப்பட உலகம் என்னை ஒதுக்கப்பார்க்கிறது என்று பல பத்திரிகை பேட்டிகளில் பதிவு செய்து வருகிறார் ஏஆர்.ரகுமான். ஆனால் அவர் அந்தக் காலகட்டத்தில் எல்லா இந்திப்படங்களையும் ஒப்புக்கொண்டாரா என்றால் இல்லை என்பதுதான் உண்மை.
தன்னைத் தேடி வந்த படங்களில் தேர்ந்தெடுத்து ஒரு சில படங்களுக்கு மட்டும் இசை அமைக்க அந்தக் காலத்தில் ஒப்புக்கொண்டவர் தான் ஏஆர்.ரகுமான். ஒரு காலத்துல தங்களுடைய படங்களுக்கு ஏஆர்.ரகுமான் இசை அமைப்பாரா என்று ஏங்கிக் கொண்டு இருந்த பல இந்திப்பட தயாரிப்பாளர்கள் ஏன் இன்றைக்கு ஓரம் கட்டுவதற்கு முயற்சி செய்கிறார்கள் என்பதுதான் புரியாத புதிராக உள்ளது. மேற்கண்ட தகவலை பிரபல தயாரிப்பாளர் சித்ரா லட்சுமணன் தெரிவித்துள்ளார்.
