தனுஷ் சிம்புவுக்கு டஃப் கொடுக்கும் எஸ்.கே!.. அடுத்தடுத்து நடிக்கவுள்ள 5 முக்கிய படங்கள்!..

Sivakarthikeyan: விஜய் டிவியில் ஆங்கராக இருந்து சினிமாவில் நுழைந்து சின்ன சின்ன வேடங்களில் நடித்து ஒருகட்டத்தில் முன்னணி நடிகராக மாறியவர் சிவகார்த்திகேயன். திரையுலகில் இவரை சுருக்கமாக எஸ்.கே என அழைக்கிறார்கள். மிகவும் குறுகிய காலகட்டத்தில் இவரின் சீனியர் நடிகர்களை பலரையும் ஓவர்டேக் செய்து மேலே போனார்.

தனுஷ், சிம்பு, சூர்யா, கார்த்தி, விஜய் சேதுபதி, விக்ரம் போன்ற நடிகர்களை விட அதிக சம்பளம் வாங்கும் நடிகராக மாறினார். அவரின் வளர்ச்சி பலருக்கும் பொறாமையை ஏற்படுத்தியது. இவரின் டாக்டர், டான் போன்ற பல படங்கள் 100 நாட்கள் ஓடி வசூலை அள்ளியிருக்கிறது.

காமெடி கலந்த காதல் கதைதான் அவரின் ரூட் என்றாலும் சமீபகாலமாக சீரியஸான கதைகளை தேர்ந்தெடுத்து நடிக்க துவங்கிவிட்டார். அதுவும் ஏ.ஆர்.முருகதாஸ், சுதா கொங்கரா போன்ற இயக்குனர்களின் படங்களில் நடிக்கிறார். இவரின் அமரன் படம் 300 கோடிக்கும் மேல் வசூல் செய்து சாதனை படைத்தது.

இந்த படத்தின் மெகா வெற்றிக்கு பின் தனது சம்பளத்தை 70 கோடியாக உயர்த்திவிட்டார். ஆனாலும் அவரை வைத்து படமெடுக்க பல தயாரிப்பாளர்களும் காத்துக் கிடக்கிறார்கள். இந்நிலையில் எஸ்.கே. அடுத்தடுத்து நடிக்கவுள்ள 5 படங்கள், அதன் இயக்குனர்கள் பற்றி பார்ப்போம்.

ஏற்கனவே சுதாகொங்கரா இயக்கத்தில் பராசக்தி படத்தில் நடித்து வருகிறார். இது 1960களில் தமிழகத்தில் நடந்த இந்தி எதிர்ப்பு போராட்டம் பற்றிய கதையாகும். இந்த படத்தில் ஜெயம் ரவி, அதர்வா ஆகியோரும் முக்கிய வேடத்தில் நடித்து வருகிறார்கள். ஒருபக்கம், ஏ.ஆர்.முருகதாஸ் இயக்கத்தில் மதராஸி படத்திலும் எஸ்.கே. நடித்து வருகிறார். இது ஒரு பக்கா ஆக்சன் படமாக உருவாகி வருகிறது.

இந்த 2 படங்களுக்கு பின்னர் வெங்கட்பிரபு இயக்கத்தில் நடிக்கவிருக்கிறார். விரைவில் ஷூட்டிங் துவங்கவுள்ளது. அடுத்து குட் நைட் பட இயக்குனர் வினாயக் சந்திரசேகர் இயக்கத்தில் நடிக்கவுள்ளார். அடுத்து விக்ரம் வேதா பட இயக்குனர்கள் புஷ்கர் காயத்ரி இயக்கத்தில் ஒரு படம் என பிஸியாக இருக்கிறார். அதோடு, 2018 படத்தை எடுத்த மலையாள இயக்குனர் ஜூட் அந்தோணி இயக்கத்தில் ஒரு படத்தில் நடிக்கவும் பேச்சுவார்த்தை நடத்தப்பட்டு வருகிறது.