Suriya karuppu: உண்மையில் சினிமாவுக்கு வரவேண்டும் என்கிற ஆசையெல்லாம் சூர்யாவுக்கு இருந்ததே இல்லை. பல இயக்குனர்கள் கேட்டும் முடியாது. ஆர்வமில்லை என மறுத்துவிட்டார். டெக்ஸ்டைல் தொழிலில் பெரிய அளவுக்கு வரவேண்டும் என்பதே அவரின் நோக்கமாக இருந்தது. ஆனால், நேருக்கு நேர் படத்திலிருந்து அஜித் விலகிய போது அந்த வேடத்தில் சூர்யாவை நடிக்க வைக்க ஆசைப்பட்டார் இயக்குனர் வஸந்த்.
வஸந்த் கேட்டபோதும் அதே பதிலைத்தான் சொன்னார் சூர்யா. ஆனால், அதன்பின் ‘முயற்சி செய்து பார்க்கலாம்’ என்கிற எண்ணம் வர ஓகே சொன்னார் சூர்யா. நேருக்கு நேர் துவங்கி சாக்லேட் பாயாக பல படங்களிலும் நடித்தார். அவரை மாற்றிய பெருமை அமீர், கவுதம் மேனன், பாலா ஆகியோருக்கு மட்டிமே உண்டு. நந்தா, காக்க காக்க, பிதா மகன் போன்ற படங்கள் சூர்யாவுக்கு முக்கிய படங்களாக அமைந்தது.
அதே சூர்யாவை கமர்ஷியலாக மாற்றியது இயக்குனர் ஹரி. அவர் இயக்கிய ஆறு, வேல், சிங்கம் சிங்கம் 2 போன்ற படங்கள் சி செண்டரிலும் சூர்யாவை பிரபலப்படுத்தியது. கமர்ஷியல் படங்களில் நடித்தாலும் ஜெய்பீம், சூரரைப்போற்று போன்ற படங்கள் நல்ல கதையம்சம் கொண்ட படங்களாக அமைந்தது. சூர்யா ஒரு சிறந்த நடிகர் என்பதை அந்த படங்கள் காட்டியது.
அப்படி இருந்தும் அடுத்தடுத்து அவர் நடித்து வெளியான எதற்கும் துணிந்தவன், கங்குவா, ரெட்ரோ போன்ற படங்கள் சூர்யாவுக்கு சூப்பர் ஹிட் படங்களாக அமையவில்லை. இதுபற்றி ஊடகம் ஒன்றில் பேசிய வலைப்பேச்சு பிஸ்மி ‘சூர்யா நல்ல கதைகளை தேர்ந்தெடுத்து நடித்து வந்தார். ஒருகட்டத்தில் தனக்கு இருக்கும் ரசிகர்களை பார்த்து தன்னை விஜய், அஜித் ரேஞ்சுக்கு கற்பனை செய்து கொண்டார்.
அதன்பின் அவர் தேர்ந்தெடுத்து நடித்த படங்கள் அவருக்கு வெற்றியை கொடுக்கவில்லை. அங்குதான் அவர் சறுக்கினார். அதேநேரம், அடுத்து வெளியாகவுள்ள கருப்பு படம் அவருக்கு வெற்றிப்படமாக அமையும் என நினைக்கிறேன்’ என சொல்லியிருக்கிறார்.
ஆர்.ஜே.பாலாஜி இயக்கத்தில் சூர்யா நடித்திருக்கும் கருப்பு படத்தின் டீசர் நேற்று வெளியாகி ரசிகர்களிடம் வரவேற்பை பெற்றது. டீசரை பார்க்கும்போதே இப்படம் ஒரு பக்கா கமர்ஷியல் மசாலா படம் என்பது தெரிகிறது.
