LIK Movie: கோமாளி திரைப்படம் மூலம் தமிழ் சினிமாவில் இயக்குனராக களமிறங்கியவர் பிரதீப் ரங்கந்தான். ரவி மோகன் ஹீரோவாக நடித்திருந்த அந்த திரைப்படம் நல்ல வசூலை பெற்றது. அதன்பின் 3 வருடங்கள் கழித்து பிரதீப் ரங்கநாதன் இயக்கி அவரே ஹீரோவாக நடித்த திரைப்படம் லவ் டுடே. செல்போனை வைத்துக்கொண்டு இப்போதுள்ள 2கே கிட்ஸ் என்னவெல்லாம் செய்கிறார்கள் என்பதை படம் போட்டு காட்டியிருந்தார்.
எனவே அந்த படமும் ஹிட் அடிக்கவே பிரதீப் ஹீரோவாக வெற்றி பெற்றார். எனவே, இனிமேல் தான் இயக்கும படங்களில் தானே ஹீரோ என முடிவெடுத்தார். லவ் டுடே ஹிட்டுக்கு பின் விஜய் படத்தை இயக்கும் வாய்ப்பு கூட அவரை தேடி வந்ததாக சொல்லப்பட்டது. ஆனால், அதை ஏற்க அவர் மறுத்துவிட்டார்.
அதோடு விக்னேஷ் சிவனின் இயக்கத்தில் எல்.ஐ.கே என்கிற படத்தில் நடிக்க துவங்கினார். இந்த படத்தை மாஸ்டர், லியோ போன்ற படங்களை தயாரித்த லலித்குமார் தயாரித்தார். அதேபோல், ஓ மை கடவுளே பட இயக்குனர் அஸ்வத் மாரிமுத்து இயக்கத்தில் டிராகன் என்கிற படமும் துவங்கப்பட்டது. டிராகன் படம் வெளியாகி ஹிட் அடித்த நிலையில் எல்.ஐ.கே படம் இதுவரை முடியவில்லை.
அதோடு டியூட் என்கிற படத்திலும் பிரதீப் நடிக்க துவங்கிவிட்டார். சொன்ன பட்ஜெட்டை விட விக்னேஷ் சிவன் அதிக செலவு செய்ததால் கடுப்பான லலித்குமார் ‘இதற்கு மேல் என்னால் பணம் கொடுக்க முடியாது’ என சொல்லிவிட, விக்னேஷ் சிவன் படத்தை கிடப்பில் போட்டார். அதன்பின் பேச்சுவார்த்தை நடந்து படப்பிடிப்பு மீண்டும் துவங்கியது.
எல்.ஐ.கே படம் துவங்கப்பட்ட போது சொல்லப்பட்ட பட்ஜெட் 65 கோடி. அதன்பின் 5 கோடி அதிகரித்து 70 கோடியானது. இந்த படத்தை வருகிற செப்டம்பர் மாதம் ரிலீஸ் செய்ய திட்டமிட்டுள்ளனர். படம் துவங்கப்பட்ட நாள் முதல் ரிலீஸ் தேதி வரை கணக்கிட்டால் 2 வருடங்கள் ஆகிறது. 70 கோடிக்கான வட்டி மற்றும் வெளியீட்டு செலவு எல்லாம் சேர்த்தால் படத்தின் மொத்த பட்ஜெட் 110 கோடியை தொடுகிறது. ஆனால், பிரதீப் ரங்கநாதனுக்கு அவ்வளவு வியாபாரமெல்லாம் இல்லை. எனவே, என்ன செய்வதென்றே தெரியாமல் மன உளைச்சலுக்கு ஆளாகி இருக்கிறாராம் இப்படத்தின் தயாரிப்பாளர் லலித் குமார்.
காதல் கலந்த ஃபேன்டஸி படமாக உருவாகியுள்ள இந்த படத்தில் க்ரீத்தி ஷெட்டி, எஸ்.ஜே.சூர்யா உள்ளிட்ட பலரும் நடித்துள்ளனர். இப்படத்திற்கு அனிருத் இசையமைத்திருக்கிறார்.
